قدحت من زندي وصوانـي وشبيـت الفتيـل=وعنيت روس الخيل فالميدان واعلنت القتـال
ارقى واروم النايفه وليا قدمت ابـرك واشيـل=مااحسب حساب الحمل دام اني زبونً للثقـال
كن الشوارد من بنات الفكر عسكر في فصيـل=حسب الاوامر والقياده صح مافيهـا اختـلال
اغرف من بحور الجزاله واحتسي زاد وصميل=واصمد وانا شامخ ولا اكتب بالتفاهه والهـزال
من ماسمعت وشفت لاتشره عليّه لـو اعيـل=الوضع مزري والحقيقه واضحه ماهي الخيـال
وابوك انا من ماكر الاحـرار يالمـد البخيـل=ارسي ومرسايه على البيدا كما صـم الجبـال
اخذ من فعول النشاما زود ماارضـى بالقليـل=واقف وميقافي بعـز وفيـه هيبـه وارتجـال
والحق له ميزان ماينقـص ولا يقبـل يميـل=دايم مسيره مستقيـم وميـزة الحـق اعتـدال
وانا هنا موجود ساطع بالسمـا واكبـر دليـل=لاهتضت تتمخض قصيده بكر مافيهـا جـدال
وان هب نسناس القصايد موت يالقلب العليـل=فاحت من الشفقـه دلال ولاح بـراق الخيـال
يا أيها النقاد نبغى انقاذ مـن سيـل المسيـل=هال النفود وله نفـوذ يطـول ماعنـه محـال
وحنا ضحايا بين متشـرد ومنصـاب وقتيـل=صرنا نعيش وداخل الارواح ضيقه واحتـلال
والموهبه من خالق الانفس ماهي خل وخليـل=في ساحة الشعر انتكاس وكل مافيـه افتعـال
صدرونا راحت سجون وشعرنا الجزل النزيل=واعلامنا مبني على زمر التطـرف وانحـلال
في شجرة الزقـوم لايوجـد ظـلال ولامقيـل=مااكرهك مايكسيك دوراة الطبيعـه بالجمـال
وانا بشب النار من شعري عسى عمري طويل=قصيدةً تكفي عن التعبير فـي صفحـة مقـال