يا راكب اللي بويته كنها الدم = شد الخواجه مدرجن أكفراته
من مصنع البيت المريكي مصمم =نوعه فريد وكامل مواصفاته
أصناعة اللي مشربه كاسٍ ادهم = كافر يهودي ما ركع في صلاته
فوقه ضمان البيت الأبيض مترجم = مضمونةٍ فترة طويلة حياته
جمسٍ جديد ومركبه يجلي الهم = هذا هوا قلبي وهذا مناته
مركب شنب ما يركبه ورعٍ أطخم = ولا شخص أوليد الهوى في مراته
ليا دستله قامت قزوزه ترازم = أرزام هرشن ما تبين لهاته
عبارتين وبشتغاله ايقسّم = تقسيم ابن سعيد فحدى اغنياته
ترطن شكامينه تقول إيتكلم = من بوش وايا ابلير ياخذ لغاته
يا محلا مسراه فالليل الأضلم = ليا من ولد اللاش نام ابعباته
فوقه شجيع معرب الخال والعم = متعودٍ ليله سهر ما يباته
من العاصمه بعد العشا العفش حزم = والصبح يصبح فالحديثه حراته
عليه تصريح الوزاره مختم = ما ياقف السواق يبرز إثباته
على بلد بشار نبغا نسلم = والشام ناخذ سجةٍ مع بناته
فالشام وأهل الشام يا ناس مغرم = ومن كثر حبه منضر إلا قناته
قلبي أسير لحب ليلى ومريم = أنا هنا والقلب مستيسراته
شفت الحلى ذقت العسل داخل الفم = وأحلى عسل ذقته خلق في شفاته
وأحلف بربٍ كون الكون وأقسم = أن الجمال اللي خلق ما خذاته
من عاش عمره بينهن ما تندم = والعمر دامه حي هاذي طراته
ومن لامني في حبهن يشرب السم = والصبح تنشر فالجريده وفاته