يالمسعري سلطان ياامطيب الليـل=اليا ضوت لي نجمته فـي سمايـا
ارد صوت الحب باجمل مواويـل=ليتك ترد الصـوت ليتـك معايـا
ونعيش انا ويـاك جمـر التعاليـل=اللي يتواكل جمرهـا فـي حنايـا
وان هبت الانسام نسمـع تراتيـل=ويسود جو هيـام بيـض النوايـا
حتى ان اهل كازا تمد الموآصيـل=وتحس اهل قرطاج لـون الشفايـا
وين انت عن راع العيون المضاليل=اللي سفك دمـي وسـوى سوايـا
سألت وين الدرب قـال البهاذيـل=ثم ابتسم واقفآ وانـا فـي رجايـا
لولا صلاتـي والدعـا والتهاليـل=وجدتنـي مفتـون مغـرم صبايـا
والعشق والتذكار والدمـع والهيـل=صارت ملامحها بوجهـي شظايـا
لاكن ياجـرح الموانـي تساهيـل=عسى بروق الوسم تـروي ظمايـا
وتهل فـي واد الدواسـر مخاييـل=ديرة شيوخ العـز سقـم العدايـا
هذا هو الموجز ولافيـه تفصيـل=يالمسعري لاعـاد تبحـث خفايـا

ياراشد الدنيا همـوم وغرابيـل=والحـب نيـه والنوايـا مطايـا
والوقت كن يمد لك مـدة بخيـل=ومن القهر تهديـه كـل التحايـا
ويلآه ياسطوة هل الجيش والخيل=يوم العرب تمشي سرايا سرايـا
وعزآه يومي مامعي قوه وحيـل=وقضيتي ماهي بمثـل القضايـا
المشكله حبـي لذيـك المداهيـل=حبن يوصينـي عليهـا وصايـا
احبها من حب زيـن التعازيـل=ابوالجناب الدمث زيـن الحلايـا
كنه مفصلني على الحب تفصيل=اللي يكسر سوق كـل الصبايـا
يوم اذكره وعيونه تداعب الميـل=والروج الاحمر والعطر والهدايا
يطري علي الهم والحزن والويل=في غربتن سوت بروحي سوايـا
توي عرفت ان الهوى كذبة ابريل=والحب ماقـدر بيـاض النوايـا
الليل لدمـوع الشقـاوي مناديـل=والدمع لاحزان الحبايـب بقايـا
والمشكله لاخان في سترك الليل=وجحد جمايل طيبيـن السجايـا
وخلاك تسبح شاطي القال والقيل=على دروب مسرمديـن الحكايـا
واليوم ياراشـد بليـا تفاصيل=الحـب نيـه والنوايـا مطـايـا