منتديات الموازين الرسميه

يابحة حبال العنا بين الأصوات .. جري لنا موال عن كل ضيقه
لو بيني وبين الغناوي مسافات .. والصوت بحات المواجع تعيقه
هيضني اللي قاله الفيصل وبات .. قناعه وحلم ومفاد وحقيقه
ماني بندمان(ن) على كل مافات .. لو عيني بذكرى زماني غريقه
لو كانت ايامي جروح ومعانات .. انا الذي يكبر على كل ضيقه
اعدّي رجوم القصيد الطويلات .. لو كانت رجوم القصايد شهيقه
وانا صديق المفتخر بالصداقات .. والا قليل العرف ماني صديقه
تسبقني الدنيا حظوظ ونهايات .. واعايش الصلبه واعيش الرقيقه
اللي وفا لي له حزام وذخيرات .. واللي بغى فرقاي قلت بحريقه
بيني وبين الليل قصه وسمرات .. اليا رسم تظليمته للخليقه
اصدق من دموع الصغير اليتيمات .. واجمل من الضميان لابل ريقه
انادي نجومه وتنْور ليا جات .. واغفى عن سنين الزمان وافيقه
يعزف لي السهره واغنّيه كلمات ..ربي كتب انه طريقي طريقه
وخلف الحصون الباقيات القويات .. قلب(ن) صبور وحيرته تستضيقه
ماتوا وجود وعاش في قلبي اموات .. اغصان ذكراهم بصدري وريقه
في كل ليل ابدي لهم بالتحيات .. ودموع عيني من سببهم طليقه