السالفه كبرت وطالت بس أنا صبري كبير=يكسر صماصيم الجبال الشاهقه لو تصدمه
ياصاحبي سر الصداقه حاذفه في وسط بير=بير(ن)تحفظ أسرار محذور الكلام وتكتمه
سولف على كيفك وقل ياللي تشيل الهرج طيّر=اشره عليّ إن كان تلقاء واحد(ن)يفتح فمه
المزح غير وهرجة الرجال وقت الجدّ غير=اسمع بعقلك للكلام إن كان تبغاء تفهمه
وإن كان بس تقول أنا أسمع لي طبول ودق زير=الزير شي(ن) منفخ ماله كلام أترجمه
لاكن يدقونه هل الأفراح فالحفل الشهير=واللي مايلقاء له عصا يقلط عليه ويلكمه
ويدندنونه فالحروب وفالنهار المستطير=وأكرم دقن وأطلق شنب يقرب ويملى‘ محزمه
وكثرالكلام اللي على غيرالسنع ياصاحبي مافيه خير=مثل السراب اللي يلوح وتطرده ماتلزمه
ياصاحبي فرّغ غضب قلبك على البحر الغزير=وارقص طرب واضحك عجب ماهي بضحكة همهمه
أنا مخاطر وأنت وضعك هالسنه صاير خطير=وأخطر من الآثنين تركيب البيوت المبهمه
اللي معانيها طوال وقافها عجل(ن) قصير=مبعّده ومقرّبه ومقفله ومصمصمه
يدري بها الفاهم وغيره ينشوي في زمهرير=يضيع مابين الحروف المهمله والمعجمه

المشاركة الأصلية كتبت بواسطة أبن مصاول (المشاركة 432639) ما شاء الله رائعة جداً وهذا شاعر من الطراز الرفيع أخي فائز , نعم هذا هو الشعر الحقيقي الملئ بالحكم وبتركيب العبارات بطريقة صحيحه , حاولت أن أقتبس بيت أو بيتين ولكنني وجدت القصيدة كلها يجب اقتباسها .. صح لسان الشاعر عزيز الشيب وبارك الله فيما نقلت بعض الناس ربما يستغرب من قول الشاعر : ينشوي في زمهرير , ومعلوم ان زمهرير بارد جداً فكيف يشوى في البارد ولكن هنا نقول بل المثقف يعلم ان حروق الثلوج مثل حروق النار تماماً .