الله من قلبن شكى من زمانه=قلبن شكا ضيم اليالي والأيام
قلبن تكدر ما صفاله بأوانه=وتبدلت شعت نهاره بالأضلام.
كنه على ضوٍ يزود أحميانه=ضوٍ على كيرٍ يواليه لحام.
لا وبن عمي من يجيلي مكانه=هاك العضيد اللي بعد طاح ما قام.
حرن بدا طلعه بعز ومتانه=ما ياكر إلا في طويلات الأرجام.
أخر عهد يوم يتكلم لسانه=قبل العيون بزاخر الدمع تنظام.
بكيت لين الدمع زاد ذرفانه=دمعن يجي من داخل الراس عوام.
ويبكونه أقرابه وجملت أخوانه=وأمه تصيح وتنهض الصوت بهيام.
تون ونات الحمام بوطانه=وتصيح صيحة من قضب رجله الهام.
وفواز يبكي يوم فارق حنانه=وسلمان مع خمسٍ صغيرات وأيتام.
ويبكنه اللي عقب هاك الحضانه=عقب الطرب قامن يقاسن الأسقام.
دنياً تقلب كنها روجحانه=تضحك وهي تبرم لهلها بالأبرام.
يا ناس خل القلب يبتل بشانه=خلوه لو باقي مصيره للعدام.
العمر لأسباب المنايا رهانه=والعبد مكتوبٍ له أجله بالأقلام.
وخطو الفتى ماله بالأمجاد خانه=ولا هو ليا جا موسم الضيق عزام
ناشن على ساس الردى والجبانه=ويقصر عن الطولات عامٍ بعد عام.
مافيه دين ولا حصل فيه أمانه=ولا هو شجاعٍ يـنبدي به للخصام.
وخطو الفتى حرن يزود عليانه=حرٍ نهار الضيق يدعى بغشام.
وتاجٍ على الهامات فخرٍ بيانه=لبسه يفاخر به على الخاص والعام.
والقلب مما به يزود رجفانه=من هاجسٍ بين المعاليق وأوهام.
فيما مضى بيني وبينه ضمانه=واليوم صار اللي مضى مثل الأحلام.
عساه عند الله بواسع جنانه=في جنة الفردوس مع جمع الأسلام.
حقه علي أدعي بصدق وتكانه=وباق المعاني مالها عندي أحكام.