منتديات الموازين الرسميه - شوق الملوح لطرو العامريه

منتديات الموازين الرسميه (http://www.almouazeen.com/index.php)

- ديوان الشاعر شبل عصيم"شاعر الغربه" (http://www.almouazeen.com/forumdisplay.php?f=156)

- - شوق الملوح لطرو العامريه (http://www.almouazeen.com/showthread.php?t=45949)

شوق الملوح لطرو العامريه

(شوق الملوح لطرو العامريه)

البارحه رجم العنا بادي فيه = بعد صلاة العصر والشمس حيه
رجم خلا ماشفت نزل حواليه = مافيه كود الذيب والراعبيه
رجم يتعب رجل من كان راقيه = ويكشف علوه لك حزوم مديه
وقفت أمد الشوف من فوق عاليه = وآخذ مع الافكار روحه وجيه
وجلست أبيع الهم وآعود أشريه = مابين ذيك وبين هاذي وذيه
أثر الرجوم اتذكر القلب ماضيه = واتعيد ذكرى إسنينه الأوليه
جيته وباح القلب ماكان مخفيه = لاعاد مرقن فيه هاك العشيه
ذكرني بدار لي سنين ناسيه = دارن لهافي خاطري مقدريه
عسا الخيال اللي زبرمن مناشيه = يسوقه المعبود وآل البريه
يجي من القبله هبوبه تقديه = حتى يجي بفروع نجد العذيه
ولآجا علاوي نجد يمطر ويسقيه = من المضيح لاشمالي طميه
وساحوق والبهره وماوان يرويه = وعلى العجام وعبلتك يالجويه
من شان عقب الوقت تنبت مراعيه = لوكان أنا ماني براعي رعيه
أبي ليا جينا ودجنا براضيه = نشوف كل أرضه زهور نديه
والروض ربله والخزاماء يغطيه = وفيه أم سالم تلعب السامريه
ونشوف فيه الذود مبسوط راعيه = مستانس عقب السنين الشقيه
أحب ذاك الدار بالحيل وأغليه = محبته وسط الحشا داخليه
يشتاق له قلبي لياجيب طاريه = شوق الملوح لطرو العامريه
وممشاي بحزومه وشوفة صحاريه = عندي ترى تازن قصور العليه

( شاعر الغربه)

شبل عصيم الميزاني