الصحبه اللي يغيرها الزمن والفلوس = ماتستويلي وأنا ماني من أصحابها
يلعن فلوس تغيرطبع بعض النفوس = واتضيع الهقوه اللي كان يهقابها
حتى عدود الروى جفت وصارت رسوس = نشت وعصفورها ماعاد يروابها
وحتى عيال الذياب اليوم صارت بسوس = طاحت سنون الذياب وطاحت انيابها
واللي ضحك قبل عام اليوم وجهه عبوس = وينتف طرف لحيته بالكف وأشنابها
ضاعت علومه بعد ماصارفالحب سوس = وارتاع من حاجة مايحسب إحسابها
ياصاحبي بعد ماصار الزمن حد موس = الكذبه الفاشله وش عاد تبغابها
أخفيت علم الحيا وانته كبير العسوس = تبغا السحابه لحالك تاتهنابها
اصبحت في تالي الصحبه تحوس وتدوس = إنفك بيبانها واتقفل ابوابها
وانامن الوقت والدنيا خذيت الدروس = وحلفت بعض الأوادم ماتعزوابها
إسم شطبته وإسم حطيت عليه قوس = وإسم رقاء قمة الطاله وعدابها
وتعيش ياراس وتصادم مع الوقت روس = وتفداك ياراسي الكذبه وكذابها