منتديات الموازين الرسميه - ياشين الفراق ولوعته والزمان الشين

منتديات الموازين الرسميه (http://www.almouazeen.com/index.php)

- ديوان الشاعر عبدالرحمن بن غلاب (http://www.almouazeen.com/forumdisplay.php?f=97)

- - ياشين الفراق ولوعته والزمان الشين (http://www.almouazeen.com/showthread.php?t=18593)

ياشين الفراق ولوعته والزمان الشين

الايالهبوب الي على رغبتك تمشين= تروحين من ديره وتمسين في ديره

ابااعطيك مرسولي تودينه الغالين = تودينه الي مبعداتٍ مشاويره

وقولي له اني من فراقه سهير العين= اخيل السحاب الي تكاشف نواويره

لياشفت برق الليل يبرق ونوه زين= ذكرت السنين الماضيه يالله الخيره

تذكرت يوم انّا على فالنا ماشين = نشم النفل والعشب نقطف ازاهيره

ولابيننا حاسد ولابيننا واشين = وجيه النمايم مالهم عندنا سيره

ودامت علاقتنا قرابة ثلاث سنين= بعز وشرف والكل معروف تقديره

ومن بعدها صرنا بوسط البلد ناحين= اناشرق وانتي غرب ياما ابعد الديره

وصرنا كما الاغراب عقب الرخا واللين= علينا الزمان الشين دارت دواويره

ياشين الفراق ولوعته والزمان الشين= ليا صارت الاوضاع ميله ودحديره

ولكن نبي نصبر ومن ربنا راجين = وهو عالمٍ بالحال ويعرف تقديره

وحنا بقسمة ربنا دائما راضين= رضينا بما يقسم لنا شره وخيره

لعل الكريم برحمته يجمع الاثنين= على ملة الاسلام ماعندنا غيره