ألا يا حمام فوق خضر الغصون ينوح = علامك تذكرني بصوتك زمانن راح
تذكرت والذكرى تزيد الجروح جروح = تزيد الجروج وتشغل الخاطر المرتاح
تذكرت دار كان للبدو فيه سروح = منازل هل الطالات يوم الليال إشحاح
هل الهيل واهل البن والمجلس المفتوح = مشرع نهار وليل ماحط له مفتاح
وليا جاله العمسان يلقا الدلال تفوح = دلال على جمر السمر ريحها فواح
هذيك الحياة اللي لمثلي ترد الروح = حياة البداوه يوم فيها القلوب إصحاح
وأنا يوم أمر الدار وأجي معه واروح = أشوفه خلي ماكن للبدو فيه مراح
له اسنين واهله مامشو فيه عنه انزوح = وأشوف الصحاري جرد تذري بها الأرياح
أجيها ولو مالي بها يوم أجي مصلوح = غلاها يوديني لها والغلا ذباح
وعذابي ليا عديت في عالي اللحلوح = وزمت ديرة كانت مراتع جنب وإلقاح
لعل السحاب اللي لبرقه شعاع وضوح = يسيل قراء حامر وحسله وعرق ملاح
لو أن الرجوع إلها من الذاكره ممسوح = بعد منتحيت اليوم يا مصعب المرواح
قصرت القدم وليا تمشيت يا ممدوح = من الصلب للصمان واصل لجو ارماح
لكنه يذكرني بصوته حمام الدوح = لغنى بصوته فوق خضر الجريد وناح
عفا الله عن عينٍ غدا دمعها مسفوح = وعفا الله عن قلب من الوقت سده باح