عمق البحر يادخيل الله ماأحد قاسه =خل الخبر يصل للشامل ولاماسي
ماكل شاعر يجيد الشعرهوجاسه = لمسات الابداع هي الشرط الاساسي
الشعر وهبه وورث اجداد وفراسه =يامدور الهينه وجه الزمن قاسي
ذعذع نسيم القصيد وهب نسناسه = وأخترت من ندّره لين إقتعد راسي
قصيدة(ن) كفو والاوتار حساسه =تضرب على عالم(ن) مجهول وسياسي
لبّستها من جمال الشعر ولباسه =اترجم احساس ناس(ن) غير وإحساسي
مافيه مشروع يطرح غير بدراسه = لوماينفذ بوقت(ن) عجل وقياسي
لابد عقب الوسوم علوم وعساسه = وعلى رجايه بربي ماغلب ياسي
راع الحطب يابن فاطم مات مقباسه =من قلّت الاكسجين وكتم الانفاسي
اللي على أقرب جهاز يفل قرطاسه =قولوله انه تعذب والجبل راسي
تكلمو مع قليل العرف بسياسه = يمكن تغطرس جهل والإ الولد ناسي
والله لبيطي ماحقق مااحتوى راسه =ان طار وان طاح فوق الارض متواسي
مدام انا حي ماحصله اناسه =وإن متْ تنومس الوارث بنوماسي

عمق البحر يابدر معروف غطاسه =ليا تراخت محازم كل غطاسي
لو البحر دون لوّلوّه وألماسه =هوايل(ن) من عَبرها جاب الآلماسي
والشعر ادب واي شاعر يكتب احساسه = ياحي صدق الشعور وصدق الاحساسي
والرجل قدام شعره يحترم ناسه = وليا امتلا من الثقه بالنفس لاباسي
وليا افلس من آدمي مايشهر افلاسه = الناس ماهي مثل واحد من الناسي
مثل ما فالناس حشّاشه وهلاسه = فالناس ناس(ن) فداها كل هلاسي
ياخال مادام للآطناب مسّاسه = البيت مايهدم وللطنب مساسي
واللي بوسط العسل للسم دساسه = حنا مانبني البيوت الإ على ساسي
أحد(ن) على صفحة الإبداع دبّاسه =وأحد(ن)على صفحة الابداع نبراسي
ولو يتعب الناقص اقلامه وكراسه = النقص مايكمله حبر(ن) وقرطاسي
مهما تعلآ مصيره للتنكاسه = سود النوايا نهايتها التنكاسي
مايفعل الزير لكليبه بجساسه =مايجي كليب لومات ألف جساسي
ومشارك المغربي في حب كسكاسه = مبروك عليه طنجه قبل مكناسي
ولاللحقايق يابدر الشيب طماسه = يبقى الجبل طال عمرك شامخ وراسي
شف حظ جلاده وشف حظ رواسه = عليهن عيون رب البيت حراسي
وشف راعي الطاسه اللي قالب الطاسه = يصنف الناس لامنه ملى الكاسي