ابوي رباني على الطيـب والجـود.=وابوك علمني على ويـش ربـاك.!
موقفك هـذا ولـع النـار بالنـود.=يقدح وجمره داخلي مـن سوايـاك.
هاك الفرايد بالحقايق لهـا شهـود.=هَرجَه بليا صـدق خيبـه تمثنـاك.
يااللي مدحت انسان هافي ومقـرود.=مايرفعك مدحه لو اعطاك مااعطـاك.
مدحه مذمّه فيك لو سـاق لـك ذود.=وما حَطه بيمناك جمـره بمخبـاك.
لا تقطف وْرود ٍ لجل وجه نمـرود.=عرق الهشيمه مانفع فيـه مسقـاك.
ابيك تـدري بحكـة العـود للعـود.=شبت بوجه الليل لو طال مسـراك.
النعم كنز ٍ شفتـه اليـوم مفقـود.=حتى الشهامه عافت اليوم شـرواك.
محد ٍ يحوش النعم ماعنه منشـود.=والطيب مبدأ وانت بالضعف مبـداك.
في وقتنا الحالي سفاهـه ومنقـود.=تشره على هذا وتـزرى علـى ذاك.
انا رقيت الطيب والنعـم مقصـود.=كايد وصعبٍ مـا تجيبـه سجايـاك.
للمدح شحّـاذه وللحـرف عمـرود.=ما سد جوعك .. مانبت منه علباك.
وللبيع شحّاذة مـدح تقبـل الـزود.=لو يمدحه حرفك مع الوقت ياطـاك.
خذ النصيحه ريحها عـود كمبـود.=تكسب بها صيتك وتنعـم بدنيـاك.
احفظ صلاتك يحفظـك رب معبـود.=مد البصر قبرك.. وبالخلد يجـزاك.
منته على مدح الهلامـه بْمحـدود.=العز..! حط العـز سيفـه بيمنـاك.
ان طاب فعلك ولع البـرق برعـود.=السيل صيتك والقرانيـس تنصـاك.
صَدّر مقام الحق لـو ذابـت كبـود.=والجار عرضه النبي فيـه وصـاك.
احلم على الجاهل وللحلـم مـردود.=وقم للذي يركض من الظلم ينخـاك.
كِن للحقيقـه مثـل زنـدٍِ وبـارود.=تمحى حروف الباطل اللـي تبـلاك.
والخاتمه بلسانك الحكـي مولـود.=وهرّاجة المجلاس حذراي .. حذراك.
هذي عيون الشعر والطيب محمـود.=بتموت..! بين الناس ويطيب طرياك.