ياشوق خذني وأحتضني عن الليـأس=ابي دفاء حضنك عن اللياس ياشوق
ياشوق انا مع يأس الاحساس محتاس=عندك خبر باادنى خبر يحرق الموق
ياشـوق تكفـى لاتسمـع للانجـاس=أحذر يجي في سكة الوصل مطفـوق
مد الغلا ياشوق ياعـذب الاجنـاس=وأظف الحنان اللي عن الناس مفروق
ضم الحزين اللي عليه الزمـن داس=ضمة حنان وعطف ياشوق برفـوق
خل الجدايل مع حنانك لـي البـاس=مايقنع المشتـاق موعـد ومنطـوق
بين الزمن والياس ياكثـر الاتعـاس=في غيبتك عانيـت يااعـز مخلـوق
امشي على كيف الهواجيس بالـراس=يلعبي الهاجوس مـع كـل طـاروق
مـره يوردنـي مواريـد الافـلاس=ومره يقول العهـد بيديـك موثـوق
ومره على ماقيل ياظبـي الاطعـاس=كم راح قبلي من ضحيتك معشـوق
ومره اهد النفـس واقـول وسـواس=يمكن طغى حبك وانا صرت مافـوق
هاذي خوافي مهجتي لك عن النـاس=صورتها في منتهى الفـن والـذوق