من نجد دار الفخر للعز دار الكويت= سلام يضفي على الديره وسكانها
واخص عبدالله بن سعود يوم ابتديت=الصاحب اللي سلوم المعرفه صانها
ياقل شكله وغيره بالوفا مالقيت=يصل الاصاحيب لو ابعيد(ن)اوطانها
هيض هجوسي لبدع الشعر ساعة قريت =ابيوته اللي سمت بالشعر قيفانها
شاعر بشعره يصحيني ليا من غفيت=عن شب نار القصيد وقدح صوانها
لا تحسبني لشخصك يابن عمي نسيت=لا والذي شرف الكعبه مع اركانها
غالي ويبقى غلاكم فالصدر ماحييت=والمعرفه بيننا ماصك بيبانها
يالفارس اللي بسرج الكايدات اعتليت=المرجله في يمينك قاضب اعنانها
ياما بجاهك مع الاجواد قمت وسعيت=لاكشّرن الليال السود نيبانها
ماتعرف العذر والواجب ماعنه اتقيت=يومن غيرك تجيه الناس ماعانها
ون ثقل حمل اللوازم قمت به مارتخيت=كبنك انته جملها وانته احصانها
خوتك عز وتزيد اللي يخاويك صيت=ونا عليها حريص ولا ارخص اثمانها
والطيب وهبه من الله وانت منّه نشيت=ماهوب سلعه تباع بوسط دكانها
انا اشهدنك على نهج المراجل ربيت=انته بيمناك والرديان بلسانها
والشعر ليل(ن) عتيم ومع دروبه سريت=ماتهت في ظلمته والنفس بيمانها
ماتختلف بندقي واصيب لامن رميت=لوْ نجد شالت رياح الكون ظلعانها
والشك ماله مكان ولايحصّل مبيت=ياكود بصدور ناس(ن) تقصرايمانها
والشعر غيره مواجيب(ن)وراها عنيت=وعزي لمن ينقص الكيله وميزانها
ويالله ياللي لغيرك مالجيت ورجيت=تحفظ لنا اصحابنا وتردهااوطانها

روعة في قولك (عن شب نار القصيد و قدح صوانها)