منتديات الموازين الرسميه - الشاعر: فهد بن هليل الميزاني المطيري رحمه الله

بسم الله الرحمن الرحيم

أسعد الله أوقاتكم أضع بين يديكم هذي القصائد أتمنى أن تحوز على رضاكم جميعاً

قصائد متبادله بين

الشاعر: فهد بن هليل الميزاني المطيري رحمه الله

والشاعر: صالح بن دخيل الجعفري العنزي رحمه الله

قال الشاعر : فهد بن هليل الميزاني المطيري رحمه الله

هذه القصيدة موجهه الى

الشاعر: صالح بن دخيل الجعفري العنزي رحمه الله

ياراكب الي ليا رفس بالوطاء رفس ***** جربت بلف النار حتى صفالي

لياتله الثالث بلف الهواء كبس ***** مع رقرقن خالي من الطاش خالي

اسج مع الهاجوس واجاهد النفس ***** ويلعبي الهاجوس غرب وشمالي

حبست انا الهاجوس في مهجتي حبس ***** حتى اجرب قوتي واحتمالي

ماني ردياً شاربه ممتلي دبس ***** تقصر حباله عند شد الحبالي

يابن دخيل صار في وقتنا لبس ***** البوم غرد في علال الجبالي

وعبادة الدينار غدالهم همس ***** قامت تلقب شيخ ولا معالي

عجل وعطنا الراي من راسكم قبس ***** لنك حكيم الراي حر العلالي

من ربعتن تاريخهم من على عبس ***** الاد وايل محتمين التوالي

ليا هبت الهيجاء يبس الشفا يبس ***** خيالهم يفتك ذوداً غوالي

وربعي مطير مطوعت في القا الفرس ***** مرؤيت فالكون علط السلالي

عدونا نعطيه في المعركه درس ***** حتى يدور مقعده فالظلالي

واليوم صار الناب في موقع الضرس ***** ودارت بنا الايام دور المحالي

اليوم أمان وخير والبارحه وامس ***** قمنا نترخ بالحديث الزوالي

في ظل قادتنا غرس الوفا غرس ***** ولله خلاق العباد الكمالي

‏* قال الشاعر: صالح بن دخيل الجعفري العنزي

هذه القصيدة رداً على الشاعر: فهد بن هليل الميزاني المطيري

يامرحبا بالي لفا غيبة الشمس ***** ترحيبة الغالي ليا شاف غالي

وقبل الكلام مصافح الخمس بالخمس ***** والي بعدها كيف صفر الدلالي

قلت العشاء ياجارنا والشحم وامس ***** قال العشاء عطني جواب السؤالي

ثم دك هاجوس الخفا وابعد الرمس ***** ساعة سنح جزل اللحا واستوالي

قريت خط مكلفنٍ جيب ابن جمس ***** وعينت فيه العلوم الجزالي

يشكي من النمرود والهيس والنمس ***** الي لهم في هالزمان اجتوالي

يافهد جرح اليوم مايقبل اللمس ***** لكن مالك فالخلايق ومالي

مالك ومال مفضح الهرج والغمس ***** مالك ومال أهل العلوم الهزالي

من هالبشر لاينحمس خاطرك حمس ***** خلك على الشطه سواة الجمالي

لاتحسبن اليوم في حكم قبل أمس ***** ولاتحسبن الين مثل الريالي

ولا زمانٍ دقلته تفضح العمس ***** مابان فيه الا قروم العيالي

وجانا زمان الاختراعات والطمس ***** كلً يسوي ماطرى مايبالي

تفكير بعض الناس يافهد ملتمس ***** سيطر على رمح ابا زيد الهلالي

لكن طيع الشور وابعد عن السمس ***** خلك مع الذيدان روس المفالي

واسلم من أهل الهمس والطمس والدمس ***** كفاك رب الكون سوء اليالي