ليا ضاق صدرك سج للي يسلون=أهل الكرم واهل الشرف والشكاله
تلقا رجالٍ يوم تقبل يهلون=عاداتهم كسب الثنا والجماله
على التقاليد القديمه يحامون=ويحاربون أهل الردى والرذاله
أفعال أهاليهم عليها يسيرون=هل الشيم واهل القيم والجزاله
ما طاوعوا في سلمهم من يقولون:=(ترى التقاليد القديمه جهاله)
قالوا نسير ونترك البخل والهون=ينزل على اللي ما أنتفع من حلاله
نفعل وكثر المال ما سر قارون=تاجر ولا فكه من الموت ماله
حنا على عاداتنا لا تقولون=ذا حالنا والنذل يمشي لحاله
نطرب اليا جونا النشاما يخصون=ونفخر ونكسب شكرهم والنفاله
ليا أدبروا ذولا هذولاك ياتون=في مجلسٍ دايم تعاقب دلاله
في بيت قرمٍ عنده العلم مضمون=أمثال أبن تركي ليا جا مجاله
(عبدالله التركـي) من اللي يعدون=ان جا مجالٍ للكرم والرجاله
من ربعتن في حزت الضيق يرسون=دايم كما ترسي رواسي جباله
ماني من اللي يمدحون ويريدون=لكن أعرف الدار وأذكر رجاله
أفخر براع الطيب من حيث مايكون=لو من جنوب الدار ولا شماله
واللاش لو يملك ثمانين مليون=لا نافعٍ نفسه ولا من عنا له
دايم حياة اللاش من دون في دون=ولا خير فاللي ما يضلك ضلاله
لكن يا غافل ترى العمر مرهون=لا بد من يومٍ قريبٍ زلاله
يومٍ عنه بعض الأوادم يغفلون=ولاهين لين أنه تجيهم أرحاله
والمرجله ماهي على ما يريدون=ولا عمرهم قالوا تجي بالسهاله
تصعب على اللي لو بغوها يعجزون=وكم واحدٍ عنها تقاصر حباله
قاصر نظر واللي بجنبه يشوفون=وان قيل شف معنا تزايد جفاله
محروم من جانب ومن حال مفتون=لين أقصرت مراجله عن عياله
قلته وأنا عندي على السلم قانون=واشرب ازلال الماء وخلي حثاله
ولاني من اللي بالمثايل يمارون=وان قيل له شاعر طمع بالكماله
تلقاه مع ناسٍ يجون ويروحون=لكن طبعه ما يعرف العداله
يمشي جهه والناس مع درب يمشون=ومخالفٍ سنة نبي الرساله
وصلوا على المختار ياللي تصلون=عداد من حج الحرم من اقباله