السلام عليكم ورحمة الله وبركاته
صباح / مساء الخير
نعتذر عن الإنقطاع وقل المشاركة

ياخالق الإنسان ياعالم الغيب=ياللي بيدك الخير والشر كله
يامن بأمرك تشرق الشمس وتغيب=يامزينٍ وجه السما بالاهله
ابعد مابين إخطاية وسكة العيب=وحفظ لساني لايجي منه زله
زله سببها يزعلون الاصاحيب=وتفرح عدوٍ فيه غيره وغله
يركض بها الهراج في ضلع وشعيب=ويبني عليها اعلوم من غير ادله
لوعندنا ماله احقوق ومطاليب =ركب النمايم صوبنا مستقله
والهرج بعضه فالقفى يمكن ايصيب=اليا لقاله واحدٍ مصغي له
والكذب فالرجّال نقص وعذاريب=راعيه من بدّ الخلايق نمله
هذا زمان شفت فيه التعاجيب=قليل من تلقاه مذهب ومله
اللي منول قد هقينابه الطيب=وقلنا هذا يذري عن الشمس ظله
عّود على ربعه يحشّ العراقيب=وسيف الردى في كل يومن يسله
صحيح من دور من الخايب يخيب=ولاغيّر الحنظل سحابٍ يعله
عليّت نفسي نايفات المراقيب= وابعدت شوحي للنجوم المطله
مالي ومال اقريبين المحاضيب=ارقى سنود ودرب الامجاد ادله
يمناي ماعتادت على شقة الجيب=لوصابني من دهر الايام خله
سقنا الجمايل ماحسبنا المذاهيب=وفعل الجميل انموت ما نستغله
ومضّيع الرفقه خبيث الهناديب=ترفض مبادينا نشرف محله
وليا لفانا ما نقصنا المواجيب= ون صّد عنا قلت ليت ولعله
لِنّا على طيب الموارد مجاذيب=وفينا الكرم والطيب طبع وجبله
ياللي عشان الريش بعت المخاليب=بعت المعزة واشتريت المذله
لاتحسبنك من طوال الاشانيب=اللي تعقد الحبل غصب وتحله
حمّاية القالات حصن الاطاليب=امكّحلة عين العدو بالاخله
جيش الرخا لاعاد ترسل مناديب=منته محصلك بلد تستحله
يوم النوايب جات رحتو مهاريب=وضيم من هو حطكم مسندله
بانت وجيه اهل القفوش المكاذيب=سود القلوب معانقين المضله
لكن حنا للمواقف معازيب=واللي يدور كسرنا ماحصله
نثبت ونرسي كالجبال المناصيب=ولاهمّنا من ضاع سلمه ودله
كبار البخوت ولاكبار اللغابيب=اللي طرايقهم على الكبد عله
اخر زمان الشاه تفتن على الذيب=والأمر يسند ناس ما هم هل له
وسيف اليقين انحربه الشك والريب=واضد من درب الحقيقه يزله
اعطتني الدنيا دروس وتجاريب =حتى عرفت العلم دقه وجله
وايقنت لو راس الجهل يمتلي شيب=ايموت عرفه ما ينّور سجله

ونتمنى أن تحوز على اعجابكم

الإداره :


http://www.almizany.info//uploads/im...9c6f54fdca.gif

والــكــذب فـالـرجّــال نــقــص وعــذاريــب
راعـــيــــه مـــــــن بـــــــدّ الــخــلايـــق نــمــلـــه
هــــذا زمــــان شــفـــت فــيـــه الـتـعـاجـيـب
قــلــيـــل مـــــــن تــلــقـــاه مــــذهــــب ومــــلــــه

اعطتني الدنيا دروس وتجاريب =حتى عرفت العلم دقه وجله
وايقنت لو راس الجهل يمتلي شيب=ايموت عرفه ما ينّور سجله

الله الله على الابداع والجزاله والتكمن الشعري
قصيده لايكتبها الا شاعر جزل بحجم ابو طلال
قصيده من بدايتها الى نهايتها لا تمل من قرائتها لما تحمله من قوة سبك ومعاني قويه
صح لسانك ملايين يابو طلال على التحفه وحقاً تستاهل الوسام

وفعلاً قصيده راقيه وتستاهل التقييم *****