هذه القصيده المتواضعه اهداء مني الى رمز من رموز الموازين ومطير عامه
الا وهو الشيخ ناصر بن خالد بن مدلج حفظه الله
ياهاجسي حضر من الفكر تعبير = طالبك حضرلي بيوتٍ جزيله
اباامــــدح الي له معزه وتقدير = الي نعده من رموز القبيله
ناصر ولد خالد زبون المخاسير = ليا ثقل حمل الليالي يشيله
شيخ ٍ ولد شيخٍ يقود الطوابير = يوم الليالي بين عدله وميله
جده وابوه اهل السيوف البواتير = عيال فاضي متعبين الاصيله
مامثلهم وقت اللقا والمقادير = شيوخنا الي كاسبين الجميله
وقفاتهم بالطيب تفرق عن الغير = وشبورهم يوم الملاقا طويله
من طيبهم قادو جموع الطوابير = وشداد بن مدلج براس الطويله
يوم الصباح ويوم وقت المظاهير = انــــتم لنا درعٍ يـــــذري نزيله
واليوم عم الامن والناس في خير = وانتم سوات الحصن يسلم دخيله
الطيب ماجاكم بجمع الدنانير = واهل الفضائل ما عطوكم فضيله
شئٍ مورث من جدودٍ مناعير = ووقــفــاتكم بالطيب ماهي قليله
واليوم يابو بدر ياشيخ ياامير = يالي على ربعك سوات المخيله
مالك وجاهك بالليال المعاسير = تســـوقهــــن لو المسافه طويله
عز الله انك شيخ مانته معيثير = وعز الله انك عز من تنتميله
عساك تسلم من سهوم المقادير = تعيش ياراع الفعول الجزيله
والطيب لو يهرج يناديك ياامير = يقول ابن مدلج ولا ابغا بديله
الي فتح بابه للأجناب ومطير = ومن ضدته سود الليالي يجيله
ناصر ولد خالد وهو ناصر الخير = في ذمتي هذا اللقب يستوي له
وختامها مني تحيه وتقــــــدير = للي كسب كل الصفات الفضيله