هاض الضمير وهاجس القلب هيضه = وقزيت من نومي وخلق الله ينامون
أبي السكات وقام عزمي يشيلني =وبينت تاريخٍ له الناس يقرون
كني وكيل أدم على ذريته = يومي وليلي مجهدٍ تقل مفتون
ماني بدمّاحٍ لغلطات مشتهي = اللي مثايلهم تقول يتهزون
أبتكلم واترك الزود والخطا = واشوف وش يصلح عن الكذب مضمون
عزمي يساعدني على ما طرالي = ودالوب فكري ينهض اللي يطيحون
واليا بغيت أقول عزمّت بالله = ابا احتمل باللي عليه يشيلون
أنا اختصرت من السوالف دلايل = نقل عن التاريخ واللي يحفظون
عن قولهم في وقتهم ما اختلفنا = ناخذ صحيح العلم والكذب مدفون
ابعلّم الجاهل بدرب المسيرة = ومن بعض الناس للحقيقه يخفّون
الشاعر اللي يبدع القاف ضيعه = وبالدليل وعن طريقه يتيهون
مثل الذي هام البحر في سباحته = شاله غروره وسط موجه يغرقون
يالمعترض مالك ورانا طلابه = مالك قصير ولا عواني تثورون
كذّبت فعل مطير واللي ذكرنا = حظك حمول وبالظليمه تهرجون
اما صغير السن يجهلك فعلهم = والاردي العرف ماتفتهم لون
واللي ذكرته بالقصيده نحله = ونعلمك في دربهم وين يمشون
واللي يسب مطير ماأرخى شرفهم = واللي مدح بمطير ما زادهم لون
سقم الحريب اليا تعدى حدوده = اليا طارت الغدفه وقاموا يعنون
كم واحدٍ يزمي ودسنا كرامته = عقب هديره دايخ الراس ممهون
تقول أهل نجد جلوا عن ديارهم = والا مطير في نضركم يطيرون
نجدٍ سكناها سـنين طويله = يوم الهوى صافي وفيها يصولون
من مويه هكران عليه انحدرنا = وفيها من أجواد القبايل يحربون
تاقع منازلهم جنوب وشمالنا = وضرب الهنادي بينهم ما يكفون
نوبٍ علينا نعترف في طعنهم = ونوبٍ عليهم ومن نحرنا يصدون
ولابه نهارٍ مايطير غباره = هذا طريح وذاك طاعن ومطعون
عشرة مناويخ بنجد اقتحمنا = نوبٍ لنا الزوده ونوبٍ يغلبون
أحدٍ يهاجمنا ونرد خيلهم = وأحدٍ يناوخنا ومنا يشدون
قبل السعود بحكمهم يملكونه = وقبل الرشيد اللي بفترة يحكمون
قصيرنا منهم حراب العريني = وشلفٍ نروي جبها لين يقفون
وسرد السبايا للعدو ذاخرينها = وحمر النواظر للحرايب يصالون
قبقب شراع العز والطير غنا = وعن وجهنا بعض القبايل يحوزون
يم الحصاه ويم صبحا نزلنا = وحوطه تميم اليا بغوها يمدون
ومدهالهم شمال حبر والغرابه = ومرباعهم على أبانات يظفون
طرت عليهم طاريه صملوها = نووا على المحدار والناس يدرون
ما أحدن قدر يردهم مع قفاهم = ولا علقوا عاني من اللي يخافون
جوا من فقارة نجد يزمي ضعنهم = لين من سوق الكويت يتقضون
تمشي ضعاينهم بدرب أسلافهم = لديره اللي بسمها الناس يوحون
يوم أقربوها نطحوهم حرابه = اللي على بيض الحباري يجيرون
جونا وجيناهم وصارت معارك = وعقب مناخينٍ سكانها يحدرون
ما قلت بالأجواد قصدي رداهم = من أدبرت دنياه فيها يذوبون
حظٍ يطيح وحظ بالله يرتفع = وهاذي تدابير الولي خالق الكون
ولاني بقراض للأجاويد مسهم = سلطه من الله ينقص اللي يزودون
ولاني بقراض للأجاويد بالقفى = اللي لهم فعل على الموت يردون
وفي منزل الصمان بس انتهينا = وعند النفود ودبدبتها يحامون
محدن عطانا طيب ولا شرينا = أسباب مركاض به الناس يدرون
من فوق شهب ما قصرنا غذاها = ومصقلاتٍ للجماهي يشيلون
وان طوّحن بيض العذارى غطاها = علوى لعسرين القبايل يردون
في شف شقحٍ دايم الدوم بالخطر = دايم جنبها من وراها يبارون
دايم وحمران النواظر حماها = ومن ذاق منهم طعنه مايعودون
وواصل سندنا درعنا من اعدانا = دايم على النزل الموالي يميلون
دايم تهاذب خيلهم لحددانا = ومن جيشهم بعض الأجناب يشكون
وألاد علي بين الحفيفين نزلهم = دايم لصولات القبايل يوالون
اليا أختلط عجاجها مع خلاجها = مركاضهم فيها المصاليح يرعون
وان قيل ألاد عباد نعم القبيله = مثل الجبال الراسيه ما يزولون
قصيرهم من الأجناب روس حرابهم = وشلفٍ بها شوخ القبايل يحذفون
كم فارس تحت الحوافر وطنه = اللي بهم ضلعان نجد يسمون
تجاولن عند الطريح وتعاقبن = والكل طلق حرمته ماتشيلون
راحت على اللي شاله الكبر ضيعه = ومن قال أنا الطيب له الناس ياطون
هاذي شهود الفعل والخابر الله = ماهوب هرجٍ بالمجالس يقولون
وهاذي فعول مطير ياجاهل بها = ياللي تغطون الحسب ماتخافون
فهود الزراج اليا انتووا يم ديره = بعد المسافه دونها ما يهابون
نمسي بدار وصبحنا يم ديره = وكم من عدوٍ غافلٍ له يفاجون
ماهم شواوي بالقرايا مربهم = طوال الخطى اليا ركب القيض يمشون
بادت سمارى جيشهم من حفاها = في لاهب الجوزاء عليهن يسوجون
من دار أبو جابر على الشام كونهم = جابوا مغاتيرٍ عليها يغنون
أربع أكاوينن بقيظن تعاقبت = ما قيضوا تحت السقايف ينامون
ولو أذكر اللي خابرن به بلشنا = أتعبت نفسي واللي ورانا يعدون
ذكرت لي موجز وبينت بعضها = وهاذي مسير مطير وأنتم تخبرون
من الحره السودا اليا سيف البحر = قصور تبنا والنخل له يغرسون
واللي مكذبني يجينا نفرّجه = يلقا صحيح وللقرايا يعدون
من قصر ابن شلاح نبي نجيبها = وإنشد الشيبان عما يخبرون
أما لقيت الهرج لا صحة له = والا أعترفت ومن سنعنا تصدون
أما ركبت الغوج ياطابك الوعر = والا كسير القين والجنب مطعون
تم الجواب وما خبرته ذكرته = أنقل عن التاريخ للي يحرصون
نقلت من شيبانا من قصصنا =لعيالنا اللي بالمدارس يحفظون
وترى المراجل للعرب تفتخر بها = خطلان الأيدي للعوالي يشومون
والناس مثل الناس لافرق بينها = الا كبار الحظ فيها يفوزون
أحدٍ نصيبه يقصره عن طموحه = وأحدٍ يجي له حظ باللي يسوون
وكل القبايل بالفعايل مجربه = وشعّارها تنقل عن اللي يخبرون
واللي يبا يذكر فعايل قبايله = الباب مفتوحٍ على ما يريدون
تمت وصلى الله على سيد البشر = أللي تشفع لأمته يوم ينخون