صباح الخير ياسحر البيان وروعة التخليد = صباح النور ياذيك الحروف اللي اداعبها

صباح الفل واليشموم والنرجس صباح سعيد = يا اجمل من صباحات المشاعر يوم انا اكتبها
صباح الطيش ياثورة خيال اللي عجز لا يهيد = يا اقوى ثورة ٍ فيني جنوني من يسببها
تولم ياقصيدي لا نويت اكتبك بالتجديد = ابيك تهز كل الارض مشرقها ومغربها
ما دامه ذايع ٍ صيتك وكل قام بالترديد = بيوت ٍ غربلت ذيك القلوب اللي تعذبها
ابيك ترز رايات الجزاله ياقصيدي سيد = وتسكن فالصدور اللي اشوفك صرت مطلبها
تفاخر نعنبو جد القصيد اللي على التحديد = ليا من جاك يدبل كبد قاريها ويعطبها
كتبتك كبرياء وعزة ٍ فيني لها التمجيد = وصخرت القوافي غصب تشعلها وتلهبها
عطيتك جاذبية ارض تجذب من بغى التنهيد = منحتك من مشاعر قلب فبيوتك اخضبها
اببحر فيك ياشعري واسافر عن صحاري بيد = وانادي للهنوف اللي تبيك اليوم مركبها
ابصنع منك ياشعري عقود اللولو فوق الجيد = قلايد حب ابصنعها ما دام البنت ترغبها
ما دام انك اصيل ٍ من اصيل وتملك التأييد = ابي ذيك العنود اللي تحبك حيل تسلبها
ابيها وافيه توفي وتاخذني عنود الصيد = وتاخذ خافقي معها وتطربني وانا اطربها
والى منه بدا ذاك الصباح ونسمع التغريد = عصافير الحروف اللي على الاوراق نكتبها
تجيك المترفه تمشي وهي تقهر بنات الغيد = وترفع صوتها: شوفن حروفي كيف ارتبها
هذيك اليا لفت منها البيوت اشوف كيد وكيد = والى مني قريت الها القصايد قمت اعذربها
انا ما جيت اعذربها ولكني ابي التأكيد = ابتأكد عن احساس ٍ تشيله يوم اخاطبها
خيال ٍ واسع ٍ تملك ولا يحتاج للتنقيد = فديته شعرها لمن قريته قلت ما اعذبها
وانا يانزف قلبي ما كتبت الا من التنكيد = صبرت مصبر ٍ نفسي على الشده مدربها
سبحت بغبة بحور القصيد ولا بغيت اعيد = ولكنه جنون الشعر يجبرني اغوص بها
جديد ٍ مع جزاله ما نويت اكتبك بالتقليد = اصيل ياقصيدي والحضاره فيك اواكبها
صباح الخير يارحلة سنيني روعة التخليد = يا اجمل من صباحات المشاعر يوم اداعبها