يا قلبي اللي يعشق الفين رجال=الشكل واحد وفرقهم بالفعايل
خمسين منهم طيبهم قول وافعال=وخمسين اهم فرسان والراس طايل
وخمسين بالتقوى رسوا فوق الاطلال=وخمسين بالقوه تهزم القبايل
وخمسين منهم عاشوا العمر رحال=وخمسين دايم منوخين الرحايل
وخمسين ميزتهم ملاقيف وانذال=وخمسين عقال ووفاهم دلايل
وخمسين فيهم ونس مع راحت البال=وخمسين فيهم هم زايد وهايل
خمسين من كثر القسى صاروا جبال=وخمسين هدتهم هبوب القوايل
وخمسين حطوا باب الأشعار مدهال=وخمسين منهم حاملين الرسايل
وخمسين لأهل الحكم والدار مرسال=وخمسين دايم بالصفوف الاوايل
وخمسين عاشوا بالسلامه والأمال=وخمسين منهم احمر الدم سايل
وخمسين طاحوا بالهوى وهو قتال=وخمسين منهم عاشقين الجمايل
وخمسين راحوا بين راعي وجمال=وخمسين طبوا في بحر حلم زايل
وخمسين صوت الحان قلطة وموال=وخمسين فيهم من عيال الحمايل
وخمسين ذخر لعود يفعل إذا قال=وخمسين عيوا عن دروب الرذايل
وخمسين هلوا دمع الأحزان شلال=وخمسين باعوا حبهم بالمخايل
وخمسين طاروا للسماء كبر واهبال=وخمسين طاحوا للثرى بالعمايل
وخمسين ضاعوا بالطمع جمع الاموال=وخمسين فيهم فقر والوقت مايل
وخمسين منهم لعقدت القاف حلال=وخمسين فخر وعز لأم الجدايل
وخمسين فيهم قدوه لكل الاجيال=وخمسين بالموقع تجيهم هوايل
وخمسين شغلتهم شريحه وجوال=وخمسين تعرفهم جميع الفصايل
وخمسين دايم رزة شماغ وعقال=وخمسين حبتهم قلوب العوايل
ما يحول دون الفين حاقد وعذال=في حبهم اصبحت طايل ونايل