قصيدة الشاعر/بخيتان بن براكـــــ المدلج ...في زواج بدر دحيم أبن مدلج
بديت بآسم الله ولي التدابير== بداية اللي قال عن ما بداله
سبحان من في يديه حكم المقادير== الواحد اللي كلنا في ضلاله
ودقيت سلف اللي طوال المشاوير== ايموحها ويشوحها بالسهاله
يطو الفجوج الواسعه بالتسافير== ويلفها لف الرشى بالمحالـه
لاجيب عاريه ولاجيب تاجير== مستملكه راعيه من حر ماله
اشعار تايوتا على الخشم تحذير== للي تحدى قوته وانفعالـه
الجيب غير وكل مايضمنه غير== ماهو وكاله مير كنه وكاله
ماوقف البنزين وسط المواصير== يكفيك عن بعض الوصوف اشتغاله
آخذت مايلزم وتليته اعصير== على طريق القار كنه لحاله
من سرعته ياخذ مسار ايسر السير= وكل المواتير حازها عن شماله
من شان ابارك للرجال المناعير== اهل الوفى والطيب واهل الشكاله
عن لازمي مايكثرن المعاذير== ومايقبل المعذار في كل حاله
سلآم ياجمع الرجال ومسى الخير== عد المزون اللي تراكم خياله
اللي من اهل الحفل واللي مسايير== واللي من الجيران واللي عناله
سلام له حشمه وقيمه وتبرير== من هاجس اللي هاجسه سر باله
ومبروك ياللي يصخر الطيب تصخير==ماهي غريبه ياعريب السلاله
حرن شهر بين الحرار المشاهير== ومعربين من صوب عمه وخاله
آمير وابن آمير لاقالو آمير== كساب قول ونعم لاجى مجاله
دحيم ابن فيحان جيناه تقدير== جده عوض يوم ان كلن ثنى له
عوق الخصيم اللي براسه زعاطير== حمايت البارق على كل طاله
هداتهم يشبع بها الذيب والطير== ماهم على درب الجهل والجهاله
هذاك ابن مدلج زبون المخاسير==اللي يوصي بالمراجل عياله
رجال راعي عرف ماهو معيثير== جى له بصعبات المواقف بساله
اللي ليا شانت وجيه المثابير== مثل الجبل يلقى الذرى من لجاله
امورد الهايب على جمة البير== اليا قصر من دون ماها حباله
وابنه بدرمافيه خله وتقصير== يالله عسى كل المسرات فاله
الله يجيره من شوايب زمهرير==ويقبل سلامي واحترامي كماله
يابن الرجال اهل السيوف البوآتير== ربعي هل الطاله رجال الجماله
وقفاتهم دايم تضد المغاوير== وحريبهم مايهتني في حلاله
من عادة التاريخ مايجهل امطير== وامطير هم اهل الوفى والشكاله
عبرت ماتصلح عليه التعابير == قصيدةٍ فيها غرور وجزآلـه
افكار ابن مغلي ورود ومصادير==آخذ جزيل الشعر واترك هزاله
من هاجس ابخيتان بين الشواعير== عد الصحيح وكل ماشاف قاله
وصلاة ربي عد مارفرف الطير== على رسولن ماكذب بالرسالة
الشاعر :: بخيتان ابن براك المدلج