يابنت شوفيلك مع الناس غيري=تخيري يابنت في جاك او توم
روحي وتلقيلك بدالي عشيري=روحي وانا ماني بخوتك ملزوم
يابنت لو زينك زها في نظيري=القلب مملوك لغيرك وماسوم
لا تستخفك نظرتي وتعبيري=تراي عن عشق الغنادير مفطوم
أنا تراي عن الهوى مستخيري=قفلت بابه وأصبح القفل مختوم
وعن صيد بعض الصيد برقعت طيري=ماعاد طيري فوقهن يكسر الحوم
أعز أنا نفسي بوجهاً ستيري=وأعف عن بعض المجالات وأشوم
أنا سعودي والمعزه مصيري=وفي دار أخو نوره مكرم ومحشوم
أنا سعودي في المواقف ماحيري=إن عشت عشت بعز وإن مت مرحوم
يابنت أنا داري تعز القصيري=متوارثين الجود حاكم ومحكوم
رجالهم لو هو مقل فقيري=كنّه من العفه ملك خزنة الروم
لو كان ما يملك فراش الحصيري=منزه عرضه عن الشوم واللوم
وجدي عليهم وجد من هو كسيري=خلّوه ربعه طايح في نحى القوم
حالوا عليه وعرضوه الشطيري=طلاب ثار وصار بالثار متهوم
ينخى بني عمّه ولا له مجيري=يشوفهم مقفين والموت محتوم
بس أتوجد والتوجد خطيري=لا شك أداوي فيه زفرات مهموم
دنيا حدتني وأبعدت في مسيري=وغرّبت عن داري مقدر ومقسوم
وأصبحت في دارك سوات الأسيري=مقيّد كني على الوجه ملطوم
لا واعشيري صار قربه عسيري=بيني وبينه لجة بحور وحزوم
خلاً مكانه في ضميري كبيري=إليا ذكرته حاربت عيني النوم
اللي كلامه مثل نقع الغديري=على الشرف مادق في العرض مثلوم
ماهي بمثلك كل يومٍ تغيري=ماتستحين ولالك اعراف وسلوم
هذيك بنت مدلهين القصيري=بنت الرجال اللي لهم حظ وعزوم
عذروب أهلها ينطحون المغيري=ميقافهم ينشاف والكون مزحوم
كم فارسٍ كزوه وأصبح عثيري=من ذاق ضرب أيمانهم عقّب الزوم
ذكرتهم والدمع منّي غزيري=خيالهم ماغاب عني ولا يوم
وأذكر فروخ لي سمت للمطيري=صغار ما كمل لهن ريش وتحوم
كبيرهم توه بسن صغيري=شيهانة من عينها الموت ملحوم
يوم أتذكرهم دموعي تحيري=وأذاود العبرات وطيح وأقوم
أجي وأروح وعبرتي في ضميري=تروج في صدرٍ من العام مكتوم
يعلم بها اللي بالخوافي بصيري=شكواي للي له خفى السر معلوم
سندتها على اللطيف الخبيري=ما ني مسندها على جرف مهدوم