هذه القصيدة من أروع القصائد للشاعر الكبير سعيّد القحم الميزاني ( الداب الأسود ) الذي عرف كشاعر رد معروف على الساحة , وشاعر نبط جزل جداً يتميز قاموسه اللغوي بالجزالة وتمسكه بالبدواة ومصطلحاهتها لأنه ظل بدوياً الى آخر أيام حياته .
رحم الله ابو صلال .
وإن شاء الله ستكون عودة الى نتاج هذا الشاعر الكبير الذي انقطع عن الساحة منذا ثلاث سنوات بفعل معاناته من مرض القلب , فنسأل الله له الرحمة .
ياراكب اللي بأشهب اللون بوده = توّه جديد ولوحة الرقم تصدير
ماينكشف لونه مع الصبح كوده = لو أبرزوا خفر السواحل نواظير
أسبق من الشاهان ناهض عضوده = ماصابه الرمّاي راع الشراشير
من وارد الألفين حيّا وروده = الوارد اللي مانبا عنه تفسير
اللي شرابه مايجي بالركوده = مايشرب الا من حلوق المواصير
واليا رويّ بنزين وأحرق وقوده = صرت بلوفاته صرير العصافير
وقام يتخطى مثل ناقض جعوده = يشدي تخط الجادل أم الخواصير
ومع دوسة السوّاق يركد ركوده = ويفز بالممشى كما فزة الطير
عدّه على اللي يحتمون الشروده = أهل المواقف والسيوف البواتير
ولد العويني علمهم فيه زوده = سيوف عبدلّه على الشر والخير
فريّس مابين المخاليق شوده = يوم المجوّخ والقنا والمظاهير
أن جاء نهارٍ حكمة الله تقوده = خيالهم ياطا الوعر والعثامير
وياما ثنوهن والعلوم معقوده = يم الطريح اللي عظامه شعاثير
ومن دون وضحىٍ لبسوّها القلوده = وضحىٍ توصّف من خيار المغاتير
والعلم ثابت ماندوّر شهوده = وأنا ماأقول العلم من دون تفسير
من حرب والعتبان لنّا سنوده = لو نطلب الأصوات جتنا قناطير
يانجد ياقدام أمانه يسوده = مافيك يانجد العنا من عثابير
ياما نزلنا فيك حر وبروده = فالخوف مانطلب من الناس تيسير
وياما مشانا والليال معدوده = وياما زقلنا فالطوال السبابير
وأركابنا جيشٍ خفافٍ شنوده = سفن الصحاري مبعدات المشاوير
والخيل تبرى للوسيق محشوده = حقب العيون معسكرات المسامير
اللي عليهن للصحابي نشوده =الخيل والبيداء نواصيهن الخير
خيل الصحابه والنبي امحموده = مافوقهن غار العيال السواطير
والكل منهم دوب صبره يذوده = وكلٍ يبا وده على الفود ويغير
ثم أوهف السبّار وأومى بعوده = وغاروا على البل مبعدين المغاوير
وتناطحوا بأرضٍ براح وسنوده = لين العريني راح راسه شعاثير
وكلٍ على القصيا يكرر جدوده = وأعن الخصيم يكسّر الرمح تكسير
وأقفوا بطرشٍ يوم أحلي حيوده = مثل الخيال اللي مزونه محادير
هاذي عوايدنا بعلمٍ نقوده = والله يدبرنا على خير تدبير