من روائع - محمد عامر بن نيف
(( الفرقـــــــــــــــــــــــا ))
يا من لعين ٍ يعلّ الدمع حاجرها=علّ السواني غروس المنبت الضامي
دفاق وجدٍ مزونه هلّ ماطرها=من لهفةٍ فالضماير نوضها حامي
تنثر سواة الكواكب في تناثرها=شوق ٍ من الجدي لين سهيل مترامي
على الذي بين ناظرها وناظرها=سيفٍ غرز شفرته فالمشمش الشامي
عنقاءً من الريّ كنّ القاع نافرها=هيفاءً جسدها على المشهاة متنامي
يشفق عليها الهواء من نحف خاصرها=نبنوب غصن ٍ على جال النهر نامي
أصفى من الدرّ وأنعم من حرايرها=وأطهر من دموع عيني ساعة هيامي
وأرق بإحساسها من حرف شاعرها=وأعذب من شفوف قطر المزنة الهامي
ملمس شعرها اليا قضت ظفايرها=ما يْعُوق سبّابتي عن ملمس إبهامي
أبتع من السيف سحر ٍ في نواظرها=سيفٍ يسلــّه غضب صاهود بن لامي
فوق الثريا القصيّر من منابرها=مقامها في مقام الحاكم السامي
نفسي بها تطرق الفرقا مشاعرها=طرْق السمايم سراب الصحصح الزامي
تمضي ويرسم عنيد الوجد حاضرها=مستقبل ٍ حي مِلـْيَ العين قـدّامي
هيهات يقطع عظيم الصبر دابرها=من لحظتي من سويعاتي من ايامي
ما عندي إلا أوجز القصة من آخرها=كاسيني الوجد من راسي اليا أقدامي
فإن كان من لوعتي ما طاب خاطرها=والله لتبطي كذا يا جرحي الدامي