لعل السحاب اللي تبين قنوفه غرب = يسيل وطن مضنون عيني على دربه
يسيل مرابي من غلاها فتح له درب = بوسط الضلوع اشد من طعنة الحربه
شربت الغلاء من كأس حبه بكفي شرب = وانا ليتني قبل اشربه جزت عن شربه
تفارقت انا وياه من بعد ذاك القرب = صدمني فراقه بعد لي ما حصل قربه
رحل وابعدوه عن الوطن مبعدين السرب = حسيبي على اللي من ديرنا قلع سربه
وجودي وجود اللي غدا كل زمله جرب = ولا يملك من المال كله سواء جربه
ويا وجد حالي وجد اسير وقع فالحرب = مابين اليهود اللي تواصو على ضربه
وياونتي ونة شجيع رماه الذرب = يجر الونين وعضم ساقه يجبربه
على اللي من مطير وخواله قبيلة حرب = تناضح جروحي من فراقه كما القربه
عسى الله يلم الشمل بعد العنا والكرب = وتزين السنين ويهتني شاعر الغربه