السلام عليكم
صباحكم أحلى صباح يا منتدى الموازين
افتقدكم الفترة الماضية بسبب غيابي عن هذا المنتدى الجميل
ولكن ما نسيتكم و لا يمكن أنساكم , ولعل الأيام القادمة كفيلة بأن أحظى بتواجدي معكم
هذه القصيدة إهداء لابن مصاول استاذي و صديقي و ابن عمي لما أحببت فيه من اخلاص و روح طيبة و لا يهون كل أعضاء هذا الصرح الطيب
هدمنا المشب القديم وقمنا ببناء الجديد و اصبحت في كل يوم أمرّه عجلا و متشوقا بعد أن أعلن الشتاء هجومه
يا بوي عجّل وألحق ريال بريال = البرد روّح ما حسبنا حسابه
نبي نشب النار ونروّق البال = و نسوي الفنجال ما أطيب شرابه
عزّي لمن يسعى ورا كثرة المال = وشتاه روّح ما يطقون بابه
نبي الوجار اللي به الضو شعّال = تقر به عيني وعيني تهابه
وما نندب إلا طيب االراي والفال = يوم الرجال اليوم ما هي تشابه
اللي يجيب الطيّبة كل ما قال = حياه ربي مرحبا يا هلابه
مثل ولد سفّاح وعيال هلاّل = و خوالي اللي بالمواقف ذيابه
يستاهلون الكيف فنجال فنجال = يا حيها فالوقت عزوة و لابـه
و ان زارنا رجلن به هبال وخبال = نقدم الواجب لحضرة جنابه
علّه ليا منه عرف صار رجال = ولا عساه يروح ما يندرابه
وجدي على ما اجر عشرين موال = حيد الوجار اللي توهج شهابه
وجدي على تمرة و دلة على جال = وجدي على قومن تعرف الذرابه
هذا هوى بالي معاميل ودلال = وصوت المطر همّال يا مرحبابه
يا بوي طال الصبر و الصبر قتال = والهاجس المهتاض لا وعذابه
نبي ليا هبت هبوبن من شمال = البرد حنا حاسبينن حسابه
نايف العضيلة
http://almouazeen.com/showthread.php?p=478866#post478866