عين الفتى نيشـان ولسانـه زنـاد=ويكفيك من بعض الرجال احترامـه
والرجل عاقل يبخس الملح والـزاد=ولاخير في رجلا ً تخونه عظامـه
وانا زرعت الطيب في كل مرصاد=وفي ساعة الشـده لقيتـه زعامـه
وعرفت كيف امشي مع الناس نقـاد=وميزت فحـل الحـلال وحرامـه
وشفت العباد اصناف وجموع وافراد=واحد ً اشداد اشداد واحـدا ً مسامـه
وحدا ً يعيد قبـل ميعـاد الاعيـاد=واحدا ً نهار العيـد عيـده تمامـه
واحدا ً يقول اني علـى النـار رواد=واحدا ً على ماقـال نـازل مقامـه
ورفعت نفسي فوق حامـد وحمـاد=وعن هرجة (ن) يمي تجيب الملامه
وخليت مجلس تافه الهرج وش عاد=مامن وراه الا الـردئ والظلامـه
واخذت لي مع تهتـه البيـد مـداد=وردت لي عد(ن) كثيـر ازدحامـه
اثره عد(ن) منـه يشفـن الاكبـاد=عد الرجال اهل الوفـاء والشهامـه
واخذت دلوي مع هل الطيـب وراد=وشربت من عد (ن) لها كـم قامـه
وخاويت لي قوم ً لهم فعل وامجـاد=اهل الشجاعـه والكـرم والقرامـه
وحصلت لي قيمـه ودلـه وبـراد=وهرج (ن)نزيه وضحكة ً وابتسامه
سوالف (ن) يطرب لها كـل نشـاد=ماهـي سوالـف ذم والا غشامـه
نصايحن بالدين والطيـب وارشـاد=وحشمه وتقديـر وقـار وكرامـه
تحفظ فروض الله وبالليـل سجـاد=والقيل هو والقـال دايـم صيامـه
تمت وصل الله على محمـد الهـاد=محمد رسـول الله زعيـم الامامـه