أشكر الأخوان فهد ومحمد على مرورهم الجميل واليوم جايب لكم جميعاً سالفه.
وهي سالفة المثل المعروف (تهف مهف مقيط ورشاه) او مقيط ورشاه
<< كلنا سمعنا في هالمثل الدارج بشكل كبير لدرجة إنه نادر مايمر يوم إلا ونسمعه أو نقوله >>
وهي أن صيد الصقور كان يتم وهي في الماكر فراخ صغار وهالمواكر " الأعشاش "
تكون في شقوق الجبال علشان تسلم فريخاتها من الملقف ( جمع ملقوف )
وطريقة الصيادين في صيد هالصقور طريقه صعبه تعتمد على تعاون الاثنين
والطريقه هي كالتالي :
يتفق صيادين يصعدون لاعلى الجبل ويربط الواحد منهم نفسه بحبل قوي وطويل ويمسك خويه الثاني :
طرف الحبل وينزل خويه المربوط شوي شوي الى ان يوصل للماكر ويأخذ الفراخ ويسحبه خويه لفوق
قبل ما يسون هالعمليه يتفقون بينهم على نصيب كل واحد فيهم من الفريخات من فيهم يأخذ ( النادر )
وهو الافضل ومن يأخذ ( اللزيز ) وهذا اقل من اللي قبله وآخر شيء ( التبع ) وهذا ما لـه سووق
.. بتقولون وش دخل مقيط ورشاه ..
مقيط يا طويلين العمر اتفق مع واحد ينزله بالرشا ( الرشا حبل سميك )
الى الماكر وبعيدين يرفعه اشترط صاحب مقيط ان ( النادر )
يكون من نصيبه و ( اللزيز ) من نصيب مقيط وتم الاتفاق .
نزل مقيط وخويه يرخي الحبل شوي شوي لين وصل للماكر يوم شاف النادر في الماكر أعجبه ومن قلة عقله ..
قال ابرجع باتفاقي مع صاحبي ..
صاح على صاحبه يافلان ترى النادر لي واللزيز لك
رد عليه صاحبه اننا ما اتفقنا على كذا قال مقيط والله بكيفك النادر لي واللزيز لك
والغبي ناسي انه في مكان صعب وان الحبل بيد خويه .. ههههههههه
قال مقيط هاه وش قلت تبي اللزيز ولا بكيفك ترى النادر لي !!
رد عليه صاحبه : ( يا مقيط ................. هاك رشاك )
طاح مقيط هو ورشاه من فوق الجبل وصار ملح هههههههه !!!
وصار هذا المثل منتشر بين الناس للي يبي الفائده ويرجع بالخساره !!!!
<< وهذه رواية أخرى لقصة هذا المثل >>
يقال أنه في يوم ٍ من الايام طلع شخص اسمه مقيط ومعه احد جماعته للقنص ونصولهم ضلعٍ مشهورٍ بالطيور (( الحرار))
طبعاً الرجاجيل مآخذين إحتياطاتهم كامله من شبَك وحبال (( رشا )) ويوم وصلو للقمه
شافولهم في أحد سفوح الضلع عشٍ لطير قال مقيــط لخويه نزلني بالرشا أشوف وش في العش ..
ومن المعروف إن الشيهانه تبيض ثلاث بيضات ثنتين وكريات ووحده حره
ويكون لون البيضه الحره لون ابيض المهم مالكم بالطويله .
ربط الرجال الحبال على جاشه ودلاه خويه لمكان العش يوم وصل مقيط
قال لخويه أبشرك لقيت بيضة حره وتراها لي يافلاااااااااان >>> يناوشه الصوت من بعيد
المقرود ليته سكت ، ههههههههه
قال خويه لا والله إنها لي أنا قال مقيط اللي عند العش لا والله إنها لي أنا انا اللي لقيتها .
قال خويه ماعندك غير هالكلام ... قال مقيط لله .. قال أجل مكانك زين وهف الرشا عليه
وجلس مقيط في مكانه إلين أخذ الله أمانته . ههههههههه
ومن ذيك السالفه والمثل دارج .. مهف مقيط ورشاه .. والجبل سمي مقيط على اسم الرجال .
منقول للفائده
أبن مصاول