تقدم يا زعيم الفكر لو ان الظروف اسباع=نبي نسوق القوافي والليالي نارها حيه
نوردها على عد الجزاله والحياض ابداع=ونرويها من التصوير لعيون الشقرديه
أخيل المزنه اللي لاتكاشف برقها باضلاع=تشوف الشرق الاوسط فوق كفينٍ لجنيه
اشوف الهامه اللي مايعه بكفوفها الاشماع=فلس في خدها الايمن والايسر فيه طينيه
تجمّع وجهها بخدودها ودموعها تنبـــــاع=عرفناها بزيتونه عصرها الوقت والنيه
بكت من جور ابوها ثم اخوها للمذله طاع=سباها من حماها ثم عماها اعهود سريه
خباث نفوس فيها نجوس والبايع بهم طماع=يحرم فرض حلل عرض والنيه تجاريه
وآلا يافذةٍ في كف رجلٍ ماعليها اقماع=تهارش لجلها العدوان في صوره دفاعيه
يبون النخله اللي قد رواها العرق والادماع=وخرّاف النخل خوّان لعروق ٍ يهوديه
يصيح الشرق والمغرب دموعه تنتثر ارباع=عواصم شرق شافت غرب منحوره بجنبيه
حماه بلاد لكن البلد عاش بسمــــاه انزاع=عشيق الارض مسك وصايره بالدم مرويه
وآلا ياهيلتي فاالمركب اللي ماعليه اشراع=على بحرالعرب رادار طيارات جويه
مسيرة دفن ماشفت الكفن والسالفه بقناع=غباوة فكر والاّ الناس في حاله جنونيه
عيار الغدر فج الصدر لجت بالسما والقاع=تغاريد ٍ عليها من سهام الغدر ماريه
حقيقه والحقيقه مثل شمع ٍ بالحراره ماع=وضاع الحق بزياره وجولات ٍ سياحيه
لبسنا من ثياب الذل راغ العز منا ضاع=ومحينا المجد والذل انقش بسطور مقريه
تكدّر خاطرٍ مغبون زادت جوفه الاوجاع=عجيب الرجل يرضى الذل والقوه جماعيه
يسولف عن وجار الجار قوم البرج والمذياع=تعلل به نهار وليل في جلسه حماسيه
ذياب ٍ في ليالينا كشفها مْن السما اشعاع=فضحها نور قمرانا وجتْ للعين مرئيه
تخاطفنا كلاليبٍ عليها مْن السموم انواع=وانا سيفي صلاح الدين والصمله مطيريه
زعيم الفكر ياصف له سباعٍ كلبوها جْياع=تكشر عن نياب ٍ والحلايا اسيوف هنديه
رثيت الحال كيف الحال تتغير به الاطباع=سكن بقلوبنا ذل ورضا الاخصام جبريه
تمرّد قوم جاب اللوم صاح البوم بالاوضاع=وصارت شمسنا ضيم ٍ وفيتنا لهم فيه