حي النجف
كُتب : [ 26 - 01 - 12
- 04:44 PM ]
*** حي النجف ***
يا صاحبي خاب فيك الظن ومع الأسف = وأنا من العام زارع فيك كل الثقه
حاولت أجاملك لين الخط شفته وقف = واليوم يا صاحبي ريع المفارق وقه
وأجلس لحالك على جمر الفراق وتدف = وكاس المراره بعد كاس الحلاوه ذقه
وصلت أنا وأنت عند نهاية المنعطف = يوم الغلا طاح من خضر الغصون ورقه
أنا من اليوم مالي فيك رغبه وشف = وقدمك بكره مع الدرب المقفي سقه
ولاني بسامعك لو إنك تجي وتحلف = وش لون ابسمعك وآذاني يمك صقه
مافيه داعي تجي باخطاك لي تعترف = من بعد حان الرحيل وحلت التفرقه
وإن كان دمعك عليه من عيونك ذرف = الدمع لا تذرفه والخد لا تحرقه
وفر دموعك وعن رجوايه أرجوك كف = وخلك مع اللي حكالك في واتصدقه
ولابد الأيام تكشف ما خفاء وتعرف = يا جاهل في غروب الوقت من مشرقه
وتدري بحي الرمادي غير حي النجف = وصدام يبقى بطل لو أن بوش شنقه
شاعر الغربه
شبل عصيم المطيري
|