قلب المَره صندوق محتاج مفتاح=لا تجهله ياصاحبي حلو الاسلوب
المشكله لو كان له رمز ياصاح=هِنا يحل الصدق ويكون مطلوب
ترى النسا للقلب بستان فواح=يفوح عطره بالمعاليق ويجوب
واكثر خطر للقلب يابنت ذباح=إنه يحب ولا درى فيه محبوب
كل المشاعر صابها نْحيب ونياح=تلبس ظلام الجوف كنّه لها ثوب
رابع بيوت الشعر قدامها طاح=مير البلا لا تفهم البيت مقلوب
زيّنت قافي والمشاعر له اوشاح=كآنه فهمها يآتي القلب وينوب
أبغاه لكن دون قلبه لنا لاح=برق العلاقه ميّع الجوف مكتوب
العمر خيط ٍ فيه الايام مسباح=الخيط بايد والخرز طاح متروب
ارتاح ياعرق الهوى ليه ترتاح..!=راحتك فيها صحة العقل وقلوب
يابنت حوى آدم عياله اشباح=إلاّ بعضهم نادر الوصف مرغوب
ليّن جناب وزين روح ٍ ومزّاح=بين الخلايق طيبة القلب عذروب
والرجل قلبه كوكب اسرار سبّاح=في ظلمة ٍ ما لمّت النور بغروب
بَها جنود الشوق عدوانها امراح=بالعين بارود السهر ثار مشبوب
لا شفت نِكّه خلخل الضلع مجتاح=نبض الغلا بالقلب ما كان محسوب
الشوق ذوّب خافق الود به ساح=قلب الذهب من حبه اليوم مغلوب
يا مَنْ يودي قاف قلب ٍ لها ناح=ازعج سكون ٍ بالمعاليق مصبوب
يْقول صالح ولّع الشمع مصباح=عجّل قبل ما يذبحه صبح ويذوب
يبغاك تسبق طلعة النور مرواح=ويقيم قلب ٍ قدّم الحب مشروب