بانت خفاياك بعيونك ولو ماشرحت = بانت مراسيم نصرك بالفرح والسرور
خطاي، ماهو خطاك إنك بجرحي فرحت = هذي ذنوبي، وذنبك صار ذنب مغفور
سلحتك بخنجري واليوم منه إنجرحت = وأنا على غلطتي ماني بعدك معذور
هذي ثلاث أسئله على ضميري طرحت = وشلون ، كيف ، ومتى ، ناقشت كل الأمور
مادامها جات غلطه من بعدها إسترحت = افرح وأبفرح وأغني دام صوتي جهور
شفني تناسيت جرحي وإبتعدت وسرحت = ما عاد فيني ترى للجرح شعر وشعور
رميت ماضي حياتي من حياتي ورحت = خليت لك كل جرحٍ وسط قلبي يفور
ياصدر من ضيقتي والحزن يوم إنشرحت = عرفت كيف الصدور أحيان تصبح بحور