يالله ياللي صادق المزن تنشيه=تسقي ديار(ن) يابسه من ضماها
والله يجيبه صادق(ن) من مناشيه=والارض عقب الموت تبعث حياها
وعلى الجزيره صادق الوسم تضفيه=يخيط نوه فوق كامل سماها
والصلب والصمان تملا خباريه=اكبره(ن) الخمه تفيض وملاها
اسبوع كامل والمخايل تساقيه=وعنها الهبايب جنب الله نحاها
العشب طالع والمطر ناقع(ن) فيه=والارض زانت من حضار(ن) كساها
ياخذ شهر ويعاود السيل يسقيه=والارض من نبته تزايد حلاها
وراعي الحلال الطعم ماعاد يشريه=وبياعت الاعلاف تنتف لحاها
ويقول مخزون العلف وين اوديه=تاخذ سنه وتخيس محد(ن) بغاها
وعقب الربيع الصيف بانت مناشيه=شهرين ما ينشف عن الارض ماها
هذا كرم من واحد(ن) دوم نرجيه=اللي عبيده اليا طلبته عطاها

وسلامتكم...