بين وقت الغروب وبين وقت الشروق = كورة الأرض دارت والمكان المكان
أحسبني مع نجوم السماء صرت فوق = في خيالي وحلق فوق جو الامان
وسط قلبي رعود وفي عيوني بروق = والعرب ما دروبي لين فات الاوان
الزمان يخدعني والليالي تعوق = والله أعلم وش اللي يختلف فالزمان
لي على الوقت حق وله عليه حقوق = بين حلوه ومره ما عطاني ضمان
لوبغيته يريحني وبالي يروق = أختلف موعد التوقيت والفرق بان
ضاق صدري وحلقي بالكلام مخنوق = لو بقى فيه كلمه ما نطقها اللسان
الدروب الوسيعه قدم عيني تظوق = النتيجه تراوح بين عشر وثمان
أتوجد على الماضي بلهفه وشوق = واحتوي حاضري بالشكر والأمتنان
والله أني على الجايات ماني شفوق = قالو الناس قبلي من يدينك يدان
يازمان التعاسه منت معيه صدوق = كورة الأرض دارت والمكان المكان