صعب لامنـك فشلت..وصعـب لامنـك لقيـت
إن من يكـره نجاحـك يـدري إنـك مانجحـت
أمس ضقت ورحت أقلـب ذكرياتـي وأنتهيـت
عند صورة طفل صوته مثل صوتي لا أنجرحت
وش مثـل!!الا والله هـذا أنـا يـوم أبتـديـت
أنطق حروفٍ تلعثـم فـي لسانـي لا أنمدحـت
هذا أنا يوم الحياة فـي نظرتـي عشريـن بيـت
ومسجدين ومدرسه من طين كم فيها اصطبحـت
هذا أنا وأصبحـت اتمتـم هـذا أناحتـى بغيـت
أختنق بس القـدر عيَّـا علـى موتـي وطحـت
وصاح صوت الطفل فيني أنت من وين أرتميت؟!
قلت:أنا المستقبل اللي فيه كـم همـت وطمحـت
أمس كنـت أبيـك تكبـر بـس والله لودريـت
إنك اللي عشت لجلـه مـت عنـدك وأسترحـت
لو دريـت أن الزمـن بيجـر رجلـي ماعديـت
ولـو دريـت أن البحـور بلامواني..ماسبحـت
كان دربك لي طويـل وكـل ماشفتـك هويـت
قلت لـك كبـوة جـواد وماكبيـت الاوجمحـت
ليـه تسمعنـي وتمشـي؟!آآآه ليتـك مامشيـت
وآآآه ليتـك مـن عثـرات الأيـام أنتصـحـت
ضاعت أحلامي وضل الحزن فينـي وأهتديـت
للطريق اللـي يودنـي علـى دمعـي ورحـت
يالحـزن ليتـك مثـل دمعـي ينـزل لارقيـت
بس أعرفك لو مسحت الدمع تبقى مـا انمسحـت
"كان حلمي في وجـود إنسـان يبكـي لابكيـت
وصار حلمي في وجود إنسان يفرح ..لافرحـت
كنت أشوف الناس مثلي كل ماجعـت وضميـت
مادريت أن الأوادم نـاس فـوق ونـاس تحـت
آآآه ياأول ذكرياتي خذني فـي حضنـك نسيـت
أسألك عن وجه أبوي اللي معـه يامـا سرحـت
خذني فحضنك أبغفى..يـااااه مبطـي ماغفيـت
وأن لمحت دموع عينـي سـو نفسـك مالمحـت
خذني بحضنك وبعثر فّي جروحـي وأن قضيـت
هزلي كتفي وقل لـي عيـب تبكي..ولوسمحـت
أضحكك..وعلم زماني من أنا ومـن ويـن جيـت
طق باب الحزن وأصـرخ فّـي لامنـي فتحـت
وضمني يمك وكمـل ضحكتـك لامـن بكيـت
ودي أذكر كيف كانت ضحكتك لامـن فرحـت