ياعين هلي دمعتـك ليـن تقضيـن=الدمع في بعض المواقـف شهامـه
ياعين كنتـي بالوعـد دوم توفيـن=ودرب الوفا دايـم لطبعـك علامـه
ابكي على اختي(بنت متروك)ياعين=وصافي دموعك سارعي بـ اغتنامـه
ياعين اخوهـا ذاق مـر العذابيـن=مـن حـر فرقاهـا تكـدر منامـه
دمعك حرمني شوفها كـان تدريـن=ولانـي بـ شايفهـا ليـوم القيـامـه
عاى مشارف قبرهـا يـوم تبكيـن=يوم الكفن والحنـط فكـو حزامـه
الدمع غطـى ناظـرك ماتشوفيـن=من دونها غطـاك مثـل الغمامـه
سوي على كيفـك مثـل ماتسويـن=مايلحقـك بـ اغلـى خواتـي ملامـه
السبت في تاريخ تسعـه وعشريـن=اخر رجب سته وعشريـن عامـه
جاني خبر قال امس بين الصلاتين=عصيرقبـل الليـل يوفـي ظلامـه
حصل تصادم والجماعـة سليميـن=الا(ام بندر) مـ كتـب لـه سـلامـه
بغى يتوقـف خافقـي والشراييـن=والجسم عيـت لاتشيلـه عظامـه
تدفن صلاة الظهر والظهرهالحيـن=ومشيت قبل انـه يخلـص كلامـه
ساعـه وساعـه باقيـه ماتكفيـن=قـل للمـؤذن ينتظـر فالاقـامـه
وصلت مع لحظة خروج المصليـن=والدرب باهل الخير زاد ازدحامـه
والناس واغلبهم من الربع الادنيـن=اللـي يسلـم مـ انتبهـت لسـلامـه
ولحظة وصول الغاليه بين غاليـن=ياحي جسمٍ خف ريش النعامـه
الله يوسـع فـ القبـر ليـن ترضيـن=بـ امر العزيز اللـي رفيعٍ مقامـه
وفي جنة الرحمـن فـي دار عليـن=تسكن مع اهل الحسن والاستقامـه
بين القطـوف الدانيـه والرياحيـن=وانهار من حولك وريـح الخزامـه
يشهد لها ربي والادنى والاقصىىن=وكل القرايب من خـوال وعمامـه
ارضيتي الله والبشرعنك راضيـن=يـ اللي رحيلـك يـوم جمعـه ختامـه
جريح يا(مساعد)وانا في جرحيـن=واللـي يلومـك يستحـق الملامـه
تبغى العزا مني وانا مـن يعزيـن=كني رضيعٍ عند حـزة فطامـه
قال المثل ماحد(ن)يوص الحريصين=اوصيك لين البـدر يكمـل تمامـه
قل للصغيره للجـرس لاتروحيـن=النـاس فيهـا يامساعـد غشامـه
من خوف لاتسئل يقال امهـا ويـن=يعنى بمعنى مختصرويـن مامـه؟
لافيه من يسئل ولا النـاس داريـن=والهم يسـري فـ الضلـوع اللتهامـه
لجة ضلوعي لاذكرت الصغاريـن=من لابس الشيله وراعـي العمامـه
قل للولـد تكفـى وللبنـت تكفيـن=ممكـن يعـوض يتمهـا بابتسامـة
لاشك انـا مايكتـب الله يرضيـن=وحلو الكراء ماظنـى اقـدر انامـه
الضيف يكرم في ديـار الكريميـن=وكرامـة الله مابعـدهـا كـرامـه