ياشعر مقدارك على الرأس والعين=قدرك على راسي سوات العقالي
حيثك معودنا على الماقف الزين=فعلٍ يشرفنا بكل أحتفالي
واليوم لاجينا بحفل الموازين=اللي لهم يرخص صعيبٍ وغالي
لازم تجيب الجزل بالغصب واللين=عجل وسقها مثل سوق الجمالي
امدح ذوي ميزان سقم المعادين=ربعاً لهم قدراً مع الناس عالي
يوم انها بالفعل وسط الميادين=افعالهم تعرف نهار القتالي
أهل الرماح اللي تفج الشرايين=من ناشته يبقى من العقل خالي
اليا أعتزوا بالآد عون المسمين=فوق المهار اللي تحفر الرمالي
ياقشر حظ اللي بغاهم وياشين=يمسي عشا للذيب وسط السهالي
افعالهم تنقش ذهب في الدواوين=تبقى على مر الزمن ماتزالي
وأنا من الحرصان فعل وبراهين=افعالنا ترقى لحد الخيالي
قومٍ على فعل المواجيب حرصين=ملازمين الطيب مثل الظلالي
صدورنا للضيف درة بساتين=من دون حقة ماحسبنا الريالي
على سلوم اجدودنا دوم وافين=واللنا على لطم المعادي مجالي
وكل القبايل نعم قاصي ودانين=والكامل الله لاذكرنا الكمالي
أخوان في حكم السعود متساوين=في حكم عبدالله وحكمة مثالي
ومبروك يانايف زعيم السلاطين=تستاهل المنصب ياقرم العيالي
رشحت لنك كفو بالماقف تبين=وتشيل حملٍ ماتشيله جبالي
شيخاً ولد شيخاً وشيخة من سنين=كسبتها بالفعل ماضي وتالي
ورثٍ لجدانك توفوا وباقين=يشهد بها التاريخ في كل حالي
ويامرحبا ترحيب مسك ورياحين=مني نيابة عن كرام السبالي
ترحيبا أغلى من جميع الملايين=بالجنبي واللي عنا والموالي
يامرحبا على صحون البعارين=وعلى الشحم والبن وسط الدلالي
والعود الازرق لون الجو تلوين=عند الرجال مكملين الفعالي
وياشعر ماقصرت قدرك على العين=قدرك على راسي سوات العقالي