يالادمي دنياك هذي مغرّه=لوشفت منها ربح لابد حادور
العبره اللي بالسلف معتبرّه=وين انت عنها تتبع العمي والعور
لاضاق صدرك عالي الصوت جرّه=لوكان قلبك مايطاوعك مسرور
بالقاف والقرآن لولوه ودرّه=تلقى جزاها جنة الخلد والحور
لويعمل العامل مثقال ذرّه=يلقاه ساعة يدخل القبر مقبور
وماتنفع الكافر بعمره مسرّه= لوكان يملكله ملايين وقصور
العمر يمضى بين حلوه ومرّه=والموت حق وقابض الروح مأمور
مابه حياةٍ دايمه مستقرّه= ورزقك يجيلك رغم حاسد ومثبور
لاتنشغل بالوقت برده وحره=واحذر تصير بقسمة الناس مقهور
وحكم القدر لاجاك خيره وشره=اشكر عظيم الشان والذنب مغفور
والمجلس اللي يزعجك لاتمره=خله تراك بشوفته منت مجبور
والرجل سقها في صحاصيح بره=ومد النظر مابين ريضان وزهور
لاصار وجه القاع مافيه جره= والمشي حافي والثرى توممطور
ساعات صمت ماوراها مضره=امان من سي الأقاويل واشور
تسوى لها عدة ملايين صره=من الذهب صافي من الكنز مصرور
اطلق خيالك واترك النفس حره=وخل الطبيعه في حياتك لها دور
وبالليل لابانت نجوم المجره=اذكر بديع الخلق بأحساس وشعور
واسجد لرب الكون مره ومره=واحفظ لسانك واترك الكذب والزور
وفروض ربك خلها مستمره=وطاعتك لايدخل بها شرك وقصور
واحسب لقاء يوم(ن) تبيح الأسرّه=وماكان خافي تسمعه شكل مجهور
من تنفع الاعذار فره وكره= ابليس والدنيا سبايب مع الجور
حصن ضميرك بالعمل زين بره =بهدي الرسول ومنزل الله دستور
والثوب عن عيب المخاليق زره=الستر زين وطالب الستر مستور
والمسلم اللي يامنك لاتضره=ابعد عن الهفوات والغش محذور
احذر دعى المضلوم بصوتٍ يجره=في ليلةٍ ضلما يصيبك على الفور