يالله يافراج ياوال الافراج=ياواحدا يمك وعندك خراجي
رحمتك تضفي فوق عبدك ليا لاج=ليا رفع كفيه والليل داجي
انك تهادينا على خير منهاج=بالدين والتقوى وعبدك يناجي
اخذت فى الدنيا من العمر ماحاج=ولا شفت فيها الا العنا والسماجي
دنيا قليلاً خيرها مابها انتاج=غير الهموم وقول مهجي وهاجي
نركض به الدنيا بضحك وتبهاج =والموت مادونه مفر وملاجي
يابو معاذ الوضع يحتاج يحتاج=ومن لا تزهب مالقاله مناجي
وش عذرنا في يوم تجميع الافواج=من كل فج وكلبونا هجاجي
احدا كتابه يرفعه فوق الابراج=واحدا شمال واردله هماجي
لاجا نهارا به سؤال وتهراج=هات الجواب ولاش فيها انعراجي
كانك من اهل الخير خاطرك منباج=راضي عليك الله ولابه حراجي
وكانك من اهل الشر خايف ومنداج =خسران يالمخلوق مالك مراجي
يالعبد فكر قبل ميعاد الاسراج=قبل الرحيل احذر طريق العواجي
الدين ساس العبد له نور وسراج=مع رحمة المعبود ماش انزعاجي
يالله يالمعبود يامرس الامواج=ياواحدا عبدك لرحمتك لاجي
تجعل لنا الجنه مداخل ومخراج=فالاخره في يوم وقت الحجاجي

رد الشاعر محمد محماس الزنغوب
البارحه مانمت كني على صاج لين= النهار اقبل على الانبلاجي
سهرت مثل اللي تعرض للاحراج=لاشاف راع الدين جاه ارتهاجي
رسالتن حصلتها بين الادراج=مضمونها اثر ي في شعوري وهاجي
عبر الفضا مدري على متن ميراج=بصمات شاعرها تطابق مزاجي
يشكي من الدنيا ومن كثر الازعاج=وعلى احتياجه صرت اضم احتياجي
دنياك هذي مابها طب وعلاج=طبيبها نوبن يدور علاجي
لياقبلت بنتن تجمل بمكياج =وليا ادبرت تزعل طليق الحجاجي
عاصرت فيها واخلجت قلبي اخلاج=ومن القناعه صغت للراس تاجي
واللي مشو فيها على كل مدهاج=ماكن واحدهم على الارض داجي
وحياتنا تمشي على سلك ديباج=وصيور مايطفي شعاع السراجي
والمسعد اللي مامشا درب الاعواج=لاحل وقت الحشر تلقاه ناجي
ابعد وصم الاذن عن كل هراج=اللي يخلون المجالس حراجي
وحذراك دربن فيه حفره وبطناج=ومرافق اللي يصدمون السياجي
لو عشت فالنمسا وفي ساحل العاج=اخير من صحبة وجيه السماجي
وختمت قافي يابومشعل على العاج=من زين قافك ز ان قافي وعاجي