يا طالب الشعر جا للشعر دكتوره=اللي على سِنّته تصعب منافسته
ما هو قصورٍ بهم لكنه اسطوره=لاخم خشم الجزيله قامت فرسته
تشرب من الحبر وتبخه على سطوره=لين النشاما تشاهق عند هجرسته
لامن زهم يبرك الهاجس على زوره=ويسلمه تاج حكمه قبل عومسته
ويلْبس القاف تاجه عند جمهوره=ما همه اللي تزايد فيه غطرسته
وش عاد لو عذربه ثاير وثوره=مـَ / جفّلْ الذيب ثعلب ليل بحرسته
وان دخْن الشعر في صدره قبس نوره=وتجارب الوقت حامسها وحامسته
واحرق على الجمر عُوْده واحرق شعوره=مـَ / احرق من التبغ ملبوره وكلكوسته
ما كنه الا جنون الشعر وغروره=يا لابس الجن والا الجن لابسته
له دلةٍ بالقصايد حيل مشهوره=من ذاق دلة حمد بالشعر نومسته
وان ساقها بالمدايح ثارة بحوره=ولا يشكي اليخت وسط الموج هسهسته
ما يمدح الا ابلجٍ معروف وش دوره=لا عبّس الوقت وجهه دقت اجرسته
مخبور بالفعل يوم الناس مخبوره=أحدٍ رقا للعُلا واحدٍ على بسته
وابن حمد لا ذكرة الاصل والصوره=أشوفه الطيب والفزعات غارسته
بصدور ربعه معزْةْ عزْ محفوره=ما هو كلامٍ حروف الشعر هدرسته
صقرٍ يحلْق بجنحانه وماجوره=مساعي الخير فهرسها وفهرسته
جزاع ما ينلحق بالفعل بابوره=وفزاع للي ظروف الوقت لاهسته
جمايله كنها بالوصف نافوره=ما تنتهي لو يزيد الضخ بترسته
مركاه سمعةّ فخر وعداه مقهوره=طابت على جرْته ما تت من شرسته
عراف مشراف والانصاف في شوره=طحطوح زحزوح والصولات تارسته
مذكور منعور والصملات مذكوره=كن المراجل بكف الخمس خامسته
يمناه تكتب لحكم الطيب دستوره=وتخرج الطيب لهل الطيب مدرسته
لا هزْ لكبر قضيه راس باكوره=ارخت له الراس وأغضت غصب وهمسته
ابك انت من ترتكي له بلْ حنجوره=لو الليالي قبل ينصاك كرفسته
ما دام زندك قبس من زند اخوي نوره=وماضيك مثل الشفق لا فصّخْ دمسته
يا نعنبو لا يمي لقفيت مجبوره=من ينتخي فيك يبطي ما بعد حسته
يا سور من هدة الايام له سوره=يا ضل من شمس وقته قهر حرمسته
يا جاه غايب وجاه العز بحضوره=يا اعظم لواء قدْس الرتبه وقدْسته
يا شايل الحمل يا طايلةٍ شبوره=جتك القصيده ومدحك بحر ما قسته
مني يا ابو خالد الاعذار منثوره=الشعر يتعب وطيبك يشعب فرسته