الليلة هذي واضحة ليلة فراق=حاولت أعديها وعيت تعدي
ظروف ما تنطاق ولا راح تنطاق=صد القدر ماهو بصدك وصدي
تعال خذني بين أياديك مشتاق=قبل انتفارق حط يدك بيدي
بجلس معك ساعة حبايب وعشاق=من بعدها كيفك ولو صرت ضدي
فيني خليط اشواق بأشواق باشواق=واصل معك من كثرة الشوق حدي
ودي المك واحضنك حضنة اعناق=ياشيب عيني كل ما قلت ودي
في خاطري وش خاطري خاطري ضاق=الكون كله ضاق ماهو بقدي
حتى الدموع الي استحت كبر وأخلاق=تساقطت من فوق خدك وخدي
لوحة شعر تبكي على بيض الأوراق=بيحت فيها من ردى الحظ سدي
ليلة جفا وافراق ما مثله افراق=حاولت أعديها وعيت تعدي