النوم قفى عن عيوني له ايام=وحّل السهر في ناظري واستبده
والقلب من هم المحبين منظام= جاوز حدود الصبر ونباح سده
ياوجد حالي وجد من طاح ماقام=مشلول مايقدر على رفع يده
لاهو بحي يقوم وتقلّه اعظام=ولا هو بميت يندفن في مرده
من عقب ماهو فالمواقيف ضرغام =امسى على ظهره طريح المخده
ومن سو حاله ملّه اصحاب واعمام =ومن ربعه الادنين شاف المصده
على غزالن صوّب القلب بسهام=سهمن يفجّ القلب من قو حده
غرو(ن)جماله محكمه ربي احكام=كن الحلا والزين مخلوق قده
عينه ليا سلهم بها تكسر اقوام=وسهم المنايا بين فمه وخده
والعنق عنق الظبي والنهد قدام =تفاحتين(ن)تسحر اهل الموده
والشعر لافله على حد الاقدام=من ملمسه ما يتعب اللي يكده
اليا مشى يحرجه هبّات الانسام=شي(ن)يعّد وشي ممنوع عده
على العموم وكل ما يعني العام=مقبل ومقفي شوف عيني يشده
عقبه حياتي كلها هم واوهام =والحال وسواس المحبين هده
واجاذب الونات والناس نيّام=من لاهب(ن)بين الضلوع استمده
وراع الهوا لا صاح ماهوب ملاّم=لعل من لامه زمانه يحده
ويالله ياللي بالخفيات علاّم =ياسامع الدعوات ومجيب عبده
ترد خلي واحذف الهم وانام =أو حالي اللي قبل اشوفه ترده