البارحه قلبي نوا يقلع أقلاع = يرجف ورا حدب الضلوع الحصينه
كنه يعانقني وضيعت الأسناع = مثل اليتيم اللي فقد والدينه
قمت أتذكر صاحبي زين الأطباع = ماارضى تحول الخلق بيني وبينه
حب الوفاء مافيه تلفيق وخداع = قلبي تولعبه عسى الله يعينه
كل المشاعر وقعت له بالاجماع = محبته صارت بقلبي ثمينه
ليته يجي رهن الاشاره بالاصباع = وقول يارب أحفظه لاتهينه
فيه الجمال بحوزته كل الأنواع = حتى القمر كنه طلع من جبينه
عليه كتف وردف وعيونه اوساع = خائف تصيبه عين من حاسدينه
مدري وراي بحبها صرت طمّاع = هذا اصول الحب يامدعينه
قدم الملا عن حبها ماالبس قناع = نعلن محبتنا وتبقى متينه