ياوقت يالي صار واضح تغيرك = عز الله انك لي كشفت الحقايق

علمتني ياوقت لادار دايـــــــرك = وكشفت لي عدة امور وعوايق

وانا الذي كنت احسب اني مسيرك = واثرك ياوقت القشر مانت رايق

لك انتفاضه وانسكاب لمحابرك = وفي ساعة الشده تولع حرايق

ووقت الرخا تعطي وحنا نخيرك = ونجيب مطلوبك بشتى الطرايق

وفي ظرف ساعه كيف دارت دوايرك = وخليت الاقصى للموالي يوايق

واليوم انا ياوقت ماني بعــــــــاذرك = واشكي عليك من الخلايق خلايق

ناس(ن) تطبل لك من ايمنك وايسرك = وتقول لايق لو ماهو بلايق

وناس(ن) تحط الطيبه باسفل الدرك = وتحط بالقمه ضعوف وعلايق

وهذي عبر للي بعينه يناظرك = الا الذي ماهو من النوم فايق

وانا انبذ الهفوات واحارب الشرك = مانيب لاخايف ولانيب بايق