يا محمد من صدوده ضاق صدري=ما بقى بي لا دموع ولا ونيني
له ثمان أسنين وهو يطوي بعمري=طي بيت البدو لقفوا راحليني
ودي اصبر والحقيقة ضاع صبري=والهوى من قسوته يطوي أسنيني
إن قربته في مكانه قلت بدري=وإن بعدت اشوي يجذبني حنيني
له محبة في صميم القلب تجري=وله مقام العز بين رموش عيني
كاتمه حبه أخاف الناس تدري=والمصيبة وسم حبه بان فيني
وصلوه العلم وأخباري وعذري=وأشرحوا له حالتي يمكن يجيني
وضحوا له مقصدي من نضم شعري=وانصحوه من الجفا ليته يليني
واخبروه إني عزيزة يزيد قدري=ولغير رب الخلق ما احني جبيني
وكان حبي له مذله وفيه كسري=بمسحه من خافقي واغسل يديني
وأخر المنطوق خل الحب يسري=وش يفيد الحب إذا بصدري سجيني