هذا يالربع ابو عزيز رجال كريم لكن لحظ احيان يقف ضده له أصحاب اجناب ماهم من ربعه ولاقبيلته ودايم وهو يعزمهم وهم يتعذرون منه ويقولون إذا جالنا فرصه أبشر يابو عزيز
وفي هاك اليوم بعد ماصلى صلاة الظهر دق عليه واحد من اصحابه وبعد ماخذوا علوم بعض قال له الليله بنجي يم ديرتكم لنا لزوم فيها لكن جهز العشاء ترانا ضيوفك قال الله يحييكم وأبرك الساعات
وبعد ماسكر الجوال ابو عزيزنادى ام عزيز (الشقرديه ) وعلمها بالسالفه وقال لها تكفين ياام عزيز الليله ابغى الجماله عند الرياجيل قالت ام عزيز ليه انا قد قصرت معك في شي قال لاوالله يابنت الاجواد مير انتي تعرفين ان الرياجيل هذولي اجناب واول مره يجوني في بيتي قالت له يارجال توكل على الله وابشر بالي يبيض وجهك وقامت ام عزيز وادهرت في البيت تنظفه وترتبه وتطيبه
وعقب ماصلى ابو عزيز العصر شغل وارد عراوي (الددسن)وسيده على سوق الغنم وهو في الطريق مبسوط ويهيجن والمسجل شغاله فيه قصيده ابن شلاح المشهوره يانمر المهم وصل الرجال للسوق ليا هاك الخروف النجدي الي شعرته صافيه مثل الحرير ولاجاء في السوق كله مثله والشريطيه متجمعين حوله ويسومونه ب1100
قال ابو عزيز لراعي الخروف ياولد كم حدك فيه قال تبغاه ب1400 قال شريت يله حمل ويوم مشى ابو عزيز قال واحد من الشريطيه لخويه والله انه مالقطه هالقطه غير يبغاه فحل لغنمه قال الثاني عز الله انه عرف يختار المهم ابو عزيز في طريقه للمسلخ وقف عند هاك الإشاره وليا موقف في جنبه جيب شاص عليه شايبين واحد منهم اعور قال ياولد الخروف للبيع قال ابو عزيز لا مهو للبيع ثم افتحت الاشاره وتل ابو عزيزالددسن
قال الشايب الاعور لخويه هذا والله الخروف اللي ليا حطيته لضيوفك جّملك وان هديته في غنمك عدلها لك وبعد ماوصل ابو عزيز المسلخ وجاه ابو هنود القصاب قال اسمع ياصديق قطع الخروف مفطح والراس اشوه في النار وياويلك لو تحذف شي من الكرش والمصران وبعد ماذكى الهندي الخروف
وابو عزيز يطلع للسياره ويكلم ربعه وجيرانه ويعزمهم للعشاء ويشوف ام عزيز ويش ناقصها من طلبات في هالوقت يالربع ام عزيز ركبت الجريش وقطعت الخضار وطلعت قدر وقز الذبايح كالمعتاد(ماهو مثل بعض بنات هالوقت اللي لو تجيب لها صخل يرضع امه قالت وااااااي ياظالم وده الطباخ) نرجع للمسلخ وابو عزيزباقي في السياره ويكلم بالجوال
وابو هنود مكلمته الهنديه هاك اليوم زعلانه لان له خمسه شهور ماارسلها فلوس وصايبه على قولتهم جنجان وهو يسج الماخوذ ويقوم يقطع خروف ابو عزيز تقطيع ثلاجه ويكيسه ويحطه في الكرتون ويوديه سياره ابو عزيز قال صديق ذبيحه خلاص قال له ابو عزيز خلاص كله كويس راس موجود قال ابو هنود كله ميه ميه صديق ووقف عند السيار كالعاده ينتظر البخشيش وابو عزيز يعطيه خمسه ريال
ويحرك صوب بيته وصل مع آذان المغرب نّزل الرجال ذبيحته ونزل يصلي ام عزيز يوم شافت الذبيحه استغربت الوضع وقالت ياولد أنت وش فيك تقطع ذبيحتك تقطيع ثلاجه قال الله يهديك هذا وقت المزح قالت ياابن الحلال والله اني صادقه ماامزح وتعال شوف بعيونك وينطلق ابو عزيز مثل الصاروخ ويشوف هاك الشوفه اللي ماسرته ويقوم يجيب من العزاوي مره انا ابو عزيز ومره انا اخو فلانه
الرآي الحين ويش يقوله لام عزيز قالت مالك غير نطبخها مثل ماهي قال ابو عزيز انا ولد ابوي ولده ياحرمه انتي ويش تقولين هالحين ضيوفي اجناب ومعلميني من الظهر وآخر شي تبغينهم يقولون ابو عزيز عشآنا من ثلاجته المهم قام ابو عزيز ودق على صديقا له مسميه ابو بطنين( لأن كرشه كبيره ) وعلمه بالسالفه وقال مالك غير تسوي مثل ماقالت ام عزيز قال ابو عزيز الشرهه ماهي علاك الشرهه علي انا يوم استشيرك وانا ادري ان ماعندك سالفه قفل ابو عزيز الجوال وابو بطنين يقول في نفسه المهبول هذا لايكون هون ماعنده عشاء
ابو عزيز يالربع صار في حيره من امره سوق الغنم بعيد والمسلخ قفل والوقت ضيق وديرتهم صغيره لايوجد فيها خيارات كثيره مثل المدن الكبيره لكن ابو عزيز يسمع من الناس ان فيه مطبخ واحد في الديره يوفر ذبايح حسب الطلب المهم راح يمه ويوم جاء ويحصل ابو يمن جالس في في الاستقبال وينشده عندك ذبايح قال والله ماعندي غير خروف واحد نعيمي شوفه اذا صلح لك الآن نذبحه ونطبخه لك والساعه عشره(ليل شتاء)يكون عندك مع السواق
راح ابوعزيز وشاف الخروف ولياماهو عند خروفه الاول ولاهو حوله لكن ويش يسوي العوض ولا القطيعه قال اذبحه يابو يمن اذبحه وانتبه لاتقطعه ثلاجه ثم يلحق اللي قبله قال ابو يمن ولايهمك لكن ترى سعره ب1300قال لو تقول بمليون ماقلنا شي رجع ابو عزيز لبيته ودخل مجلسه المستقل في الحوش وفيه هاك المشب الطيب وقام عزيز(عمره 14سنه لكن طالع على ابوه دمه حي)يحط في مشب ابوه من حطب السمر دخلت علاهم ام عزيز تشيل الطوفريات الي مليانه من الفناجيل والكاسات والتمر الخلاص وقال لها ابو عزيز عن سالفه المطبخ قالت له ان شاء الله ان فيه بركه وبيكفي لكن انت وشفيك زعلان قال ياام عزيز والله ماجات على اللي في الخاطر قالت يارجال تعوذ من ابليس
لكن انت ويش رايك في هالداهيه اللي جبته لي ثلاجتنا مليانه لحم ودجاج وماراح تشيله قال ابو عزيز اخذوا اللي تاخذون منه والباقي وزعيه على جيرانك لكن لاتنسين جاركم المصري وورعانه لكن الحين بناتك وين ماشوف منهن احد قالت ام عزيز البنات من يوم جّن من المدرسه وهن نايمات يادوب صحيتهن الحين بالقوه هذا جيل عسى الله يهديه ويعينا عليه بالصبر مغير نوم وتلفزيون ومكالمات جوال على الفاضي
قامت ام عزيز وراحت يم مطبخها واخذت اللي اخذت من لحم الخروف وارسلت الباقي على جيرانها وقامت تشيك على الجريش ومرق الخضار وفجأه انقطع الغاز عندها ونادت بنتها الكبيره وقالت لها روحي شوفي عندنا اسطوانه غاز زايده البنت راحت كالعاده وارسلت اختها الصغيره(حركات بنات )جات البنت وقالت لامها لا مافيه اسطوانه مليانه
ام عزيز قالت في نفسها ماله داعي اغث ابو عزيز يطلع يدور غاز الحين الرجال تعبان واللي فيه مكفيه أخذت الشقرديه جوالها ودقت على جارتها ام مهند(ام مشعان سابقا)قالت آلو ام مشعان قصدي ام مهند افزعيلي وارسلي يمي اسطوانة غاز الحين وتجينا للعشاءدقايق وجات الاسطوانه ولاكن شي صار عند ام عزيز (ماهو مثل بعض حريم هالوقت لو زوجها في المريخ دقت عليه تبشره ان الغاز مخلص)
المهم يالربع ا ذن العشاء وصلى ابو عزيز وولده في المسجد ووصلوا ضيوفه واستقبلهم بالترحيب والسلام الحار وبعد كذا جو باقي المعازيم من ربعه وجيرانه وبالطبع كان اول الواصلين منهم صاحبنا.......(اكيد عرفتوه )ودارت فناجيل وسوالف رياجيل بين النشامى ويوم وصلت الساعه عشر وربع والعشاء ماجاء ابو عزيز بدا يقلق وصديقه ابو بطنين متكي مقابل له على المركى بعد ماخلص صحن التمر اللي عند ويتثاوب من شدة النوم طلع ابو عزيز في الشارع عند باب بيته ودق على ابو يمن آلو انتم وين رحتوا تاخرتواعلينا
قال ابو يمن مرحبا ياعم ابو عزيز انا الحين اكلمك من المستشفى اصل السواق وهو طالع يوصل العشاء عندك صار عليه حادث قال ابو عزيز وابك انت ويش تقول والحين وش صار فيه قال ابو يمن والله الرجال طيب لكن رجله قدّها مكسوره
قال ابو عزيز عساك لكسر الرجلين انا انشدك عن العشاء ماانشدك عن رفيقك قال ابو يمن الله يهديك يابو عزيز سياره صادمه وفيها صحون طعام ويش تتوقع اكيد طاحت وانكبت في الشارع ابو عزيز من شدة الموقف جلس على الارض وجاه عزيز وقال وش فيك يابوي قال له بسرعه جيب لي مويه وناد عمك جاء اخوه قال عسى ماشر علمه بالسالفه قال ابا ادق على مطاعم الديره كود احصل عندهم مندي قال تصرف وانا اخوك ماعاد لي قدره على التفكير الفشيله الليله ماعني وعنها
كلم اخوه المطاعم كلها وقال والله يابو عزيزكلهم يقولون ماعندنا لالحم ولاحتى دجاج غير واحد يقول عنده ثلاث حبات دجاج شوايه مع الرز قال ابو عزيز هذي وانا اخوك ماتعشي ابو بطنين لحاله وعلى قولة المثل الذيب عند طاريه جاهم ابو بطنين وهو يمسح بيده على بطنه وقال علامك الليله يابو عزيز على غير العاده عشاك تأخر كأنك من اهل الرياض الساعه الحين احدعش عجلوا عجلوا علينا ورانا دوامات ومدارس(ابو بطنين متقاعد وينقل معلمات) رفع ابو عزيز راسه وجر هاك الونه وقال يابو بطنين
دنيا كفى الله شرها ياشليويح ماتستوي لأهل الوجيه الفليحه
والآن لو أن القدر وضعك مكان أبو عزيز كيف تتصرف؟؟؟؟؟؟؟؟
ملاحظه هذه الحكايه ياأخوان مجرد خيال من عندي كتبتها لكم بالأسلوب الشعبي البسيط عسى أن تنال إعجابكم وأتمنى أن أرى ردودكم عليها بدون مجامله واللي يجامل عسى يصير له مثل ماصار .................... ولابلاش مافي الدعاوي خير ههههههههههههههه