ياملّ عيـنٍ يعـلّ الجيـب ذارفهـا
اربع وعشرين ساعه تهجل اهجالي
والنوم يا دحيـم عايفتـه وعايفهـا
دارت سنتها على سِهْـر وتملاّلـي
مدري على النوم عيني وش مكلّفها
للسِهْر في نونها ممسـى ومقيالـي
واللي جعل نوم عيني مـا يوالفهـا
واهج لهيب الغرام اللي برى حالي
واحالي اللي طهوم الشوق ناحفهـا
مابـاقٍ الاّ عظـامٍ جسمهـا بالـي
عليك ياللي غلاك الـروح متلفهـا
ياللي محلّك بوسط القلـب نزّالـي
غلاك نفسي عن الخفرات صارفها
لو يجمعن لي من اولهن الى التالي
لك سيرةٍ بالمحبّه ما اقـدر اخلفهـا
لو هي سبايب سهر عيني وغربالي
الاّ رجا ساعةٍ ما اقضي حسايفهـا
والاّ على السنّه السمحـا تهيّالـي
رجعت للسالفه واحييـت سالفهـا
اللي يقولونها في ماض الاجيالـي
اللي سبب موت ضيف جديع ماقفها
حيث ان ذبّاح ضيف جديع يبرى لي
الشاعر المفضل لدي / عبدالله بن عون