يالأدمي دنياك هذي مغره=لو شفت منها ربح لابد حادور
العبره اللي بالسلف معتبرّه=وأين أنت عنها تتبع العمي والعور
اليا ضاق صدرك عالي الصوت جره=لو كان قلبك ما يطاوعك مسرور
بالقاف والقرآن لولو ودره=تلقى الجزاء من جنة الخلد والحور
لويعمل العامل مثقال ذره=يلقاه ساعة يدخل القبر مقبور
ماتنفع الكافر بعمره مسره=لو كان يملك له ملايين وقصور
العمر يمضي بين حلوه ومره=والموت حق وقابض الروح مأمور
ما به حياة دايمه مستقره=ورزقك يجيلك رغم حاسد ومثبور
لا تنشغل بالوقت برده وحره=وأحذر تصير بقسمة الناس مقهور
وحكم القدر لا جاك خيره وشره=أشكر عظيم الشان والذنب مغفور
والمجلس اللي يزعجك لا تمره=خله تراك بمرته ما انت مجبور
والرجل سقها في صحاصيح بره=مد النظر ما بين ريضان وزهور
لا صار وجه القاع ما فيه جره=والمشي حافي والثرى تو ممطور
ساعات صمتٍ ما وراها مضره=أمان من سو الأقاويل وشرور
تسوى لها عدة ملايين صره=من الذهب صافي من الكنز مصرور
أطلق خيالك واترك النفس حره=وخل الطبيعه في حياتك لها دور
وبالليل لا بانت نجوم المجره=أذكر بديع الخلق بحساس وشعور
وأسجد لرب الكون مره ومره=وأحفظ لسانك وأترك الكذب والزور
وأفروض ربك خلها مستمره=طاعتك لا يدخل بها شرك وقصور
وأحسب لقاء يومِ تبيح الأسره= وما كان خافي تسمعه شكل مجهور
ما تنفع الأعاذر فره وكره=أبليس والدنيا سبايب مع الجور
حكّم ضميرك بالعمل زين برّه=بهدي الرسول وما أنزل الله دستور
والثوب عن عيب المخاليق زره= الستر زين وطالب الستر مستور
والمسلم اللي يامنك لا تضره=أبعد عن الهفوات والغش محذور
أحذر دعى المظلوم بصوت يجره =في ليلة ظلماء تصيبك على الفور