الشعر يحداني وانا اليوم حاديه =صوب الكريم الحر نسل الرجالي
اللي ينومسنا ليا حل طاريه = ومعربن مابين عمن وخالي
ياابن مصاول خاطري فيه مافيه=وهموم بقعا مالها اول وتالي
لااقبل ظلام الليل حزني اغنيه=واشعل شموع الضيق في كل جالي
كله سبايب ريمن الله يجازيه=اللي عرض باقصى حدود الشمالي
اللي يتل القلب تل بعراويه=ومتمركزن شوقه على كل غالي
مااقسى العمر لاغاب عني باراضيه=امسي مابين الناس كني لحالي
دورت له صوره مع الناس اماريه=وعيت تسير القافله باحتمالي
وجه الحياء يغلب على كل اماسيه=ومصدر قلق لاغاب عنا لليالي
اي والله ان الموت عذبن باشافيه=وجدي على شوفه وشوف الجمالي
لو مر صدفه بشارع الشانزلزيه=يبدا الجواب يعيد طرح السؤالي
هذا الجمال اليعربي من يجاريه= يالعبة الشطرنج هذا محالي
وياابن ضيف الله الحزن ماحدن يواسيه=كود الرفيق اللي عليه اتكالي
وانت الكفو ثم الكفو بالتهاتيه=لانك ولد مدلج كريم السبالي
ياما سلكت العز شتى نواحيه=وياما شربت الطيب شرب الدلالي